Tólf einstaklingar eru látnir eftir að byssumenn létu kúlum rigna yfir áhorfendur á hanabardaga í Ekvador. BBC greinir frá en árásin átti sér stað í Manabí héraði landsins, skammt fyrir utan bæinn La Valencia.

Myndbönd á samfélagsmiðlum sýna fjóra byssumenn labba inn í hringinn þar sem hanarnir eru látnir berjast og hefja skothríð yfir áhorfendahópinn. Byssumennirnir hafa verið handteknir en fyrstu fréttir herma að þeir séu meðlimir þarlendrar undirheimaklíku sem vildi jafna um samkeppnisaðila sína sem stóðu fyrir hanabardaganum.

Viðskipti með fíkniefni eru gríðarlega umfangsmikil í Ekvador en talið er að þar starfi um 20 hópar eða klíkur sem berjist um yfirvöldin í hinum ábatasama bransa. Talið er að um 70% af kókaíni heimsins fari nú í gegnum Ekvador áður en það dreifist um allan heim enda nágrannarnir, Perú og Kólumbía, helstu framleiðendur efnisins ólöglega.

Fíkniefnaiðnaðinum fylgir gríðarlegt ofbeldi en aðeins í janúarmánuði á þessu ári var tilkynnt um 781 morð í landinu, flest þeirra tengd fíkniefnum.