„Stóra breytingin var að fara aðeins einu sinni í búð í viku og versla inn og fara eftir vikumatseðli við innkaupin – það skipti öllu,“ 

segir Arnar Gauti Finnsson, skrifstofustjóri hjá KA. Hann og eiginkona hans, Íris Rún Gunnarsdóttir, reka stórt heimili. Daglega eru þau sex, en geta farið í níu manns um helgar.

Arnar Gauti segir í viðtali við Akureyri.net hvernig honum tókst að lækka matarreikninginn heilmikið auk þess sem hann er farinn að elda meira spennandi mat.

Einu sinni í viku biður Arnar Gauti gervigreindina að setja saman vikumatseðla fyrir heimilið út frá grófum óskum, til dæmis fiskur á mánudegi, kjöt á þriðjudegi og svo framvegis. Markmiðið var einfalt í upphafi: að minnka matarsóun á heimilinu. Útkoman skilaði sér einnig í fjölbreyttari mat, minna stressi í eldhúsinu og talsverðum sparnaði í matarinnkaupum.

Matarreikningurinn lækkaði

„Þegar best hefur látið höfum við farið niður í 15–20 þúsund krónur á viku í matarinnkaupum,“ segir Arnar, en bætir við að fjölskyldan fái fisk frá tengdaföður hans.  Áður var kvöldmaturinn oftast verið ákveðinn samdægurs og of margar búðarferðir leiddu oft til þess að einhverjum óþarfa var kippt með í leiðinni.

Arnar segir ferlið skemmtilegt ferli, hjónin setjast yfirleitt niður á sunnudagskvöldum ásamt yngsta syninum og biðja gervigreindina að setja saman matseðil næstu viku. Auk þess að biðja um grófar tillögur eins og að ofan er getið er einnig hægt að lista upp hvaða matvörur eru þegar til á heimilinu og fá tillögur út frá því hráefni. Gervigreindin stingur á matseðlum sem hægt er að aðlaga að eigin óskum, og það besta: uppskriftir fylgja með.

Dæmi um vikumatseðil frá ChatGPT

• Mánudagur – Ofnbakaður lax með sætri kartöflu og spínati
• Þriðjudagur – Pasta með kirsuberjatómötum og mozzarella
• Miðvikudagur – Ofnbakað kúrbítspasta með feta og sólþurrkuðum tómötum
• Fimmtudagur – Kjúklingur Caprese í ofni
• Föstudagur – Pítsa úr tortillubotni
• Laugardagur – Sætar kartöflur með grilluðum osti og avókadó
• Sunnudagur – Ofnbakaður þorskur með kartöflum og smjör-sítrónusósu

„Það er bannað að henda mat hjá okkur,“ segir Arnar sem segir fjölskylduna líka leggja áherslu á að elda mat sem auðvelt er að nýta daginn eftir. Skammtastærðir og skipulag hafi líka hjálpað til. 

„Þetta er bara nýtt verkfæri sem auðveldar svo margt í lífinu og gerir það meira að segja aðeins skemmtilegra. Maður er oft svo hugmyndasnauður þegar kemur að matseldinni og það er gaman að fá innblástur að einhverju nýju og það á svona auðveldan hátt,“ segir Arnar sem notar gervigreindina í vinnu og á heimilinu.

Á akureyri.net má finna mataruppskrift sem gervigreindin færði fjölskyldunni.