Sigurjón Þórðarson, þingmaður Flokks fólksins, segir það hálfógeðfellt að fylgjast með baráttuaðferðum útgerðarmanna gegn aðgerðum ríkisstjórnarinnar. Hótað sé að eyðileggja hráefni.

„Hvers á fiskverkafólk og sjómenn að gjalda?“ spyr Sigurjón í færslu á samfélagsmiðlum. „Á köflum getur það verið hálfógeðfellt að fylgjast baráttuaðferðum þeirra sem hafa nú tímabundinn rétt til þess að nýta sameiginlega fiskveiðiauðlind landsmann til eins árs í senn.  Ef eitthvað á að hnika við kvótakerfinu á borð við að leyfa takmarkaðar strandveiðar eða að láta raunverðmæti afla ráða við ákvörðun á skattstofni veiðigjalda, en ekki eitthvað málamyndaverð, þá er strax hlaupið upp og haft í hótunum. Það er hótað að segja upp kjarasamningum, loka fiskvinnslum og uppsögnum.“

Vísar hann til fréttar mbl.is þar sem sagt er að tilvist Lýsis sé alvarlega ógnað vegna hækkunar veiðigjalda.

„Handhafar veiðiheimildanna hafa á síðasta áratug fækkað starfsfólki í fiskvinnslum gríðarlega á annað þúsund manns og lokað vinnslum m.a. á Seyðisfirði með skömmum fyrirvara. Alls ekki er það aðeins vegna tækninýjunga – alls ekki,“ segir Sigurjón.

Ástæðan sé fyrst og fremst sú að fiskur sé í meira magni fluttur óunnin úr landi. Þriðja hver ýsa fari óunnin úr landi, 2 af hverjum 5 körfum og 7 af hverjum 10 steinbítum.

„Það má reikna með að gert sé upp við sjómenn og hafnarsjóði á verði sem er langt undir raunvirði í framangreindum tegundum en samt er fiskurinn sendur óunninn úr landi og jafnvel seldur í gegnum skúffusölufélög,“ segir Sigurjón. „Það er jafnvel gengið svo langt að haft er í hótunum um að eyðileggja hráefni, þ.e. að hætta að slægja þorsk og taka upp á þeirri nýbreytni að flytja hann óslægðan úr landi. Þessi viðbrögð undirstrika nauðsyn þess að aðskilja veiðar og vinnslu.“