Bjarni Már Magnússon, deildarforseti og prófessor við lagadeild Háskólans á Bifröst, hefur kallað eftir því síðustu vikur að stofnaður verði hér hér á landi. Hefur Bjarni meðal annars lýst því í greinum í Morgunblaðinu að í ljósi breyttra aðstæðna á alþjóðavettvangi geti Ísland ekki lengur verið herlaust ríki. Leggur hann til að tekin verði upp herskylda, meira fé verði varið í varnarmál og varnarmálaráðuneyti stofnað.
Sjá einnig: Bjarni Már segir að Íslendingar þurfi að stofna her og leyniþjónustu
Á vef RÚV er fjallað um orð Karls Steinars í Silfrinu í gærkvöldi en þar sagði hann að lögregla gæti kallað til fólk úr röðum almennings í hættuástandi, til dæmis ef stríð brýst út. Hugnast honum þessi leið betur en að íslenskur her verði stofnaður.
„Hvað erum við þá að tala um? Sjóher, landher eða flugher? Við eigum ákveðnar lagaheimildir, meðal annars almannavarnakerfisins, þá getur lögregla kallað fólk til. Við eigum þær heimildir, þær valdbeitingaheimildir. Sjálfum hugnast mér mun frekar að við styðjum við þær stofnanir sem eru í landinu,“ er haft eftir Karli Steinari á vef RÚV.
Bætti hann við að hægt væri að kalla út fleiri hundruð manns ef svo ber undir, engin mörk væru á því.
„Það væri hægt að kalla til fólk á tilteknum aldri sem uppfyllir tiltekin skilyrði og er tilbúið að taka að sér ákveðin verkefni, eins og varðgæslu á ákveðnum stöðum undir stjórn lögreglu. Það væri hægt að fara einhverjar slíkar leiðir. Sjálfum hugnast mér slíkar hugmyndir mun meira, því sú umgjörð er til, lagalega,“ sagði hann.
