Það var í nóvember sem stjórn Eflingar gaf frá sér ályktun þar sem Bakkavararbræður, Lýður og Ágúst Guðmundssynir voru fordæmdir fyrir framgöngu þeirra gegn starfsmönnum verksmiðja sinna í Bretlandi. Eins lýsti Efling yfir samstöðu og stuðningi við félaga sína í breska stéttarfélaginu Unite the Union sem þá höfðu verið í verkfalli svo vikum skipti til að krefjast bættra kjara.
Unite The Union sendi í dag tilkynningu til íslenskra fjölmiðla þar sem félagið segist hafa snúið aftur til Íslands til að stigmagna slaginn við Bakkavör.
Sjá einnig: Lýsa yfir andstyggð á framgöngu Bakkavararbræðra
„Aktívistar og meðlimir Unite hafa snúið aftur til Íslands og farið með baráttu sína fyrir mannsæmandi launum til Reykjavíkur, en það er liður í vinnudeilum félagsins við matvælafyrirtækið Bakkavör. Hundruð starfsmanna eru í ótímabundnum verkfallsaðgerðum í verksmiðju Bakkavarar í Spalding, Lincolnshire, eftir heilu árin af launaniðurskurði. Verkfallsaðgerðir hófust snemma í haust.
Stærstu hluthafar Bakkavarar eru íslensku athafnamennirnir Ágúst og Lýður Guðmundssynir. Lýður Guðmundsson hefur áður verið sakfelldur fyrir fjármálamisferli gegn íslensku þjóðinni. Nú eru hann og bróðir hans að þéna milljarða á kostnað illra launaðra verkamanna í Bretlandi.“
Unite segist hafa sent baráttufólk í höfuðstöðvar Bakkavarar á Íslandi og í gær afhentu þeir formanni borgarráðs bréf. Félagið leitar í ráðhúsið út af viðræðum Reykjavíkur og Laki fasteignir um uppbyggingu leikskóla við Rafstöðvarveg í Elliðaárdal. Laki fasteignir er í eigu fjárfestingafélagsins Pekron sem er í eigu Ágústar og eiginkonu hans. Eins hafi Unite fundað með félögum sínum í Eflingu sem og háttsettum íslenskum stjórnmálamönnum.
Ritari Unite, Sharon Graham, segir samkvæmt fréttatilkynningunni: „Okkar félagsmenn eru að berjast fyrir mannsæmandi launum í Bretlandi og við vitum að barátta okkar nýtur víðtæks stuðnings á Íslandi en þar hafa borgarnir séð þann skaða Guðmundssynir geta valdið. Guðmundssynir þurfa að átta sig á því að Unite mun ekki sætta sig við að félagsmenn þeirra fái fátæktarlaun og við höfum gert baráttuna alþjóðlega til að beina henni gegn þeim sem hafa valdið til að gera þær breytingar sem félagar okkar krefjast.“
Tekið er fram að Guðmundssynir eiga helming hlutafjár í Bakkavör og hafi því mikil ítök í rekstrinum. Bakkavör hafi skilað rúmlega 17 milljörðum í hagnað á síðasta ári og á síðustu fimm árum greitt 29 milljarða arð til hluthafa. Engu að síður séu flestir starfsmenn verksmiðjunnar í Spalding aðeins með 2.119 kr. á tímann sem sé um 18 kr. meira en sem nemur breskum lágmarkslaunum.
Síðustu þrjú ár hafi laun verksmiðjustarfsmanna lækkað um rúmlega 10 prósent. Unite fer nú fram á launahækkun upp á að meðaltali tæpar 150 krónur á klukkustund. Slík hækkun nemi aðeins um tveimur prósentum af hagnaði Bakkavarar.
