Gatnagerðargjöld í Reykjavík munu hækka um allt að 90% samkvæmt tillögu Einars Þorsteinssonar borgarstjóra, sem tekin verður fyrir á fundi borgarstjórnar þriðjudaginn 4. febrúar.
Hækkunartillaga borgarstjóra er lögð fram á sama tíma og miklar umræður eiga sér stað um, hvernig unnt sé að draga úr byggingarkostnaði til að auðvelda uppbyggingu á íbúðarhúsnæði. Borgarráð vísaði í síðustu viku tillögu um breytingar á gjaldskrá vegna gatnagerðar til borgarstjórnar. Samkvæmt henni hækka gatnagerðargjöld fjölbýlishúsa úr 5,4 í tíu prósent og parhúsa og raðhúsa úr 11,3 prósentum í fimmtán.
„Breytingin gengur í berhögg við slíkar óskir enda mun hún hækka íbúðaverð og er viðbótarskattur á húsbyggjendur og mun hafa neikvæð áhrif á húsnæðismarkaðinn í borginni. Með breytingunni mun Reykjavíkurborg enn auka álögur á húsbyggjendur og þar með íbúðakaupendur. Ekkert sveitarfélag á landinu leggur jafnhá gjöld á húsbyggjendur og Reykjavíkurborg og líklegt er að umrædd hækkun hækki íbúðaverð enn frekar.,“ segir Kjartan Magnússon borgarfulltrúi Sjálfstæðisflokksins.
Þessi mikla hækkun gatnagerðargjalda bætist við önnur gjöld og kvaðir, sem húsbyggjendur í Reykjavík inna nú þegar af hendi. Reykjavíkurborg innheimtir nú þegar afar há byggingarréttargjöld (innviðagjöld), sem geta numið nálægt 60 þúsund krónum á nettófermetra í fjölbýlishúsi. Eftir breytinguna munu byggingarréttargjöld og gatnagerðargjöld því samanlagt nema nálægt tíu milljónum króna fyrir 100 fermetra íbúð í fjölbýlishúsi.
Á neðangreindri mynd má sjá tillögu borgarstjóra ásamt greinargerð. Þar kemur fram að hækkun gatnagerðargjalds nemur 85% á fjölbýlishús, 33% á parhús og raðhús og 38% á annað húsnæði. Í raun er um meiri hækkun að ræða þar sem með breytingunni verður tekið upp gatnagerðargjald á bíla- og hjólageymslur ofanjarðar. Nú er orðin skylda að byggja hjólageymslur og er því um ný viðbótargjöld að ræða. Gatnagerðargjald á einbýlishús verður óbreytt.
Samkvæmt núgildandi gjaldskrá er gatnagerðargjald íbúðar í fjölbýlishúsi 16.338 krónur á fermetra (brúttó). Með breytingunni hækkar gjaldið um 85% eða í 30.256 krónur. Að viðbættu nýju gjaldi fyrir hjólageymslu má gera ráð fyrir að hækkunin nemi um það bil 90%.
60 fermetra íbúð (72 fm. brúttó) í fjölbýlishúsi. Gatnagerðargjaldið nemur 1.176.349 krónum fyrir hækkun en 2.243.425 kr. eftir hækkun. Hækkunin nemur því 1.067.075 kr. fyrir umrædda íbúð eða 90,7%.
70 fermetra íbúð (84 fm. brúttó) í fjölbýlishúsi. Gatnagerðargjaldið nemur 1.372.408 krónum fyrir hækkun en 2.606.496 eftir hækkun. Hækkunin nemur því 1.234.088 kr. fyrir umrædda íbúð eða 90%.
80 fermetra íbúð (96 fm. brúttó) í fjölbýlishúsi. Gatnagerðargjaldið nemur 1.568.466 krónum fyrir hækkun en 2.969.566 eftir hækkun. Hækkunin nemur 1.401.101 kr. fyrir umrædda íbúð eða 89%.
90 fermetra íbúð (108 fm. brúttó) í fjölbýlishúsi. Gatnagerðargjaldið nemur 1.764.524 krónum fyrir hækkun en 3.332.637 kr. eftir hækkun. Hækkunin nemur 1.568.113 kr. eða 89%.
100 fermetra íbúð (120 fm. brúttó) í fjölbýlishúsi. Gatnagerðargjald nemur 1.960.582 krónum fyrir hækkun en 3.695.708 kr. eftir hækkun. Hækkunin nemur því 1.735.126 kr. eða 88,5%.
