„Það er fullt til­efni til þess að end­ur­skoða þessi mál og koma á fót sér­stöku úrræði, mót­töku­deild, fyr­ir er­lenda nem­end­ur þannig að þeir læri tungu­málið og aðlag­ist bet­ur ís­lensku skóla­kerfi og sam­fé­lagi,“ seg­ir Marta Guðjónsdóttir, borgarfulltrúi Sjálfstæðisflokksins, í samtali við Morgunblaðið í dag.

Aukafundur var haldinn í skóla- og frístundaráði Reykjavíkur á miðvikudag að ósk Mörtu og Helga Áss Grétarssonar, en bæði eru fulltrúar Sjálfstæðisflokksins í ráðinu.

Sjá einnig: Faðir stúlku í Breiðholtsskóla óttast að stórslys sé í uppsiglingu – Mættu með öxi heim til nemanda

Mikið hefur verið rætt um málefni nokkurra nemenda í Breiðholtsskóla að undanförnu sem hafa verið til vandræða vegna ofbeldis, bæði andlegs og líkamlegs, í garð annarra nemenda.

Marta segir við Morgunblaðið að á fundinum hafi fulltrúar í fyrsta skipti fengið upplýsingar um málið á vettvangi borgarinnar. Það sé alvarlegt að ekki hafi verið gripið fyrr inn í.

Í samtali við Morgunblaðið segir Helgi Áss að nýr sviðsstjóri skóla- og frístundasviðs hafi tekið til starfa fyrir rúmum tíu dögum. Hann hafi greint frá því á fundinum að „reyndur skólamaður“ hafi verið fenginn til starfa í Breiðholtsskóla sem muni vinna að því að taka á ástandinu.

Þannig hafi þegar verið gripið til þess ráðs að stía árganginum í sundur sem fimmmenningarnir sem hafa verið til vandræða eru í. Þá hafi verið ráðið fleira starfsfólk til að sinna öryggismálum og kennslu.

Helgi segir að dæmi séu um að foreldrar barna af erlendum uppruna svari ekki yfirvöldum og úrræði skorti til að taka á móti slíkum nemendum.

„Í stað þess að ræða þessi mál á grund­velli staðreynda, þá er reynt að halda lok­inu á pott­in­um og kalla þá rasista sem vilja fá raun­hæf­ar úr­lausn­ir í skóla­mál­um,“ seg­ir Helgi Áss meðal annars við Morgunblaðið þar sem nánar er fjallað um málið.