Morgunblaðið hefur farið mikinn í umfjöllun sinni um styrkjamálið svokallaða, þegar Flokkur fólksins fékk styrki frá ríkinu án þess að uppfylla þar til gerð skilyrði. Síðar kom á daginn að þetta átti einnig við um fleiri flokka.
Í grein sinni segir Heimir Már að eftir að Flokkur fólksins fór í samstarf með Viðreisn og Samfylkingu eftir kosningarnar í lok nóvember hafi „eiturpennar á Mogganum án alls siðgæðis sem einkennir góða blaðamennsku“ farið á stjá.
„Þeir höfðu rekið tærnar í að það „vantað áttunda afrit af eyðublaði númer níu,“ svo vitnaði sé í Megas í skráningu Flokks fólksins hjá ríkisskattstjóra. Annað eins hneyksli höfðu pennar blaðsins, við húrrandi undirtektir þingmanna Miðflokksins og sumra Sjálfstæðismanna, ekki rekið augun í á öllum lýðveldistímanum. Gjaldþrot bankakerfisins og tæknilegt gjaldþrot Seðlabankans, svo önnur feimnismál séu látin liggja á milli hluta, komust ekki á hálfkvist við þetta,“ segir Heimir Már í grein sinni og heldur áfram:
„Hrútarnir höfðu bara ekki fyrir því að nefna að Sjálfstæðisflokkurinn var heldur ekki stjórnmálaflokkur í augum Skattmanns og fjármálaráðuneytisins undir stjórn formanns Sjálfstæðisflokksins sem greiddi þessu félagi áhugafólks um ýmislegt smálegt 167 milljónir hinn 25. janúar 2022. En það ár tóku í fyrsta skipti gildi breytingar á lögum um stuðning við stjórnmálahreyfingar. Í augum Skattmanns gat Sjálfstæðisflokkurinn á þessum tímapunkti allt eins verið Kiwanisklúbbur. Hvernig mátti nokkurn mann renna í grun að þetta Sjálfstæðisfélag væri í raun stjórnmálahreyfing?“
Heimir Már fer svo yfir það hvernig aðrir flokkar, til dæmis Sjálfstæðisflokkurinn, voru í svipuðum sporum og Flokkur fólksins og fengu greiðslur.
Hann segir að andi laganna hafi verið að styðja við hreyfingar sem sannarlega eru stjórnmálahreyfingar. Þá hafi Flokkur fólksins fengið hrós fyrir ársreikninga sína til Ríkisendurskoðunar þar sem gerð er grein fyrir öllum fjárreiðum flokksins.
„Það eru engin leyndarmál í fjármálum Flokks fólksins eins og Ríkisendurskoðun hefur einmitt lýst ánægju sinni með. Allt upp á borðum og það sem meira er, ársreikningarnir eru öllum opnir á vef Ríkisendurskoðunar, einnig eiturpennum og pólitískum hrútum.“
Grein Heimis Más má lesa í heild sinni hér.
