„Ég er frjáls!“ skrifaði Sigríður Hagalín Björnsdóttir, rithöfundur og blaðamaður, á Facebook um helgina þar sem hún tilkynnti að hún hefði sagt upp áskrift sinni að streymisveitunni Spotify.
„Lengi ætlað að gera það vegna hraksmánarlegrar framkomu fyrirtækisins við tónlistarmenn, sem hafa þurft að þola algert tekjuhrun eftir að streymisveitan tók yfir stærstan hluta markaðarins. Ég varð enn ákveðnari í því þegar í ljós kom að hún var farin að lauma gerviflytjendum og gervigreindartónlist inn á listana hjá sér til að sölsa undir sig enn stærri hluta af greiðslum til tónlistarmanna.
Ástæðan fyrir því að ég hikaði var sú, að þetta er bara svo fjári þægilegt. Allir listarnir mínir voru þarna inni, það væri svo mikið vesen að byggja þá upp annars staðar. En þegar ég frétti að fjárfestingarfélag Daniels Ek, stofnanda og stjórnanda Spotify, væri farið að fjárfesta í þýska fyrirtækinu Helsing, sem er að þróa hernaðargervigreind sem velur skotmörk – manneskjur – á vígvellinum og drepur þær, var mælirinn fullur.“
Sigríður segir aðeins hafa þurft einfalda Google-leit til að finna leiðbeiningar í breska dagblaðinu Guardian um aðferðir til að flytja spilunarlistana sína yfir á aðra streymisveitu og hún hafi valið Tidal, „sem borgar listamönnum talsvert betur en Spotify, býður upp á meiri hljómgæði, og er ekki notað til að fjármagna aðferðir til að láta gervigreindina drepa fólk, svo ég viti til.“
Hvatti Sigríður vini sína til að kaupa tónlist lifandi listamanna á vínyl eða geisladiskum, fara á tónleika, gefa tónlist í jólagjafir. (Eða bækur! Ekki gleyma bókum!) Bætti hún síðar við að það væri vandlifað, henni hefði verið bent á Tidal sé líka í eigu vopnasöluþrjóta og ætlaði hún að skoða Apple Music. „Nútíminn er trunta og ég dey sennilega ein, grafin undir plötustaflanum mínum. Mér sýnist Deezer vera sniðugur. Hann borgar listamönnum að vísu ekki jafnmikið og Tidal, en virðist vera vammlaus og sæmilega þægilegur í notkun. Og svo er hann franskur.“
Sigríður er því laus undan Spotify, en Steinar Sveinsson leiðsögumaður segist sömuleiðis vilja vera frjáls; frá Sigríði.
„Ég vil líka verða frjáls … frá Sigríði Hagalín Björnsdóttur. Það er ekkert mál að verða ,,frjáls” frá Spotify líkt og Sigríður gerir hér mikið úr. Maður annað hvort kaupir ekki áskrift eða segir henni upp hafi maður gert það. Hið einfaldasta mál.“
Í færslu sem Steinar deilir í Facebook-hópnum Báknið burt segir hann hins vegar ómögulegt að verða frjáls frá Sigríði.
„Ég borga beint fimm nauðungaráskriftir til að standa undir launum hennar hjá ánauðarmiðlinum RÚV, vegna mín persónulega og fyrirtækja minna.
Heimilisbókhaldið verður fyrir enn frekara hnjaski vegna annarra fjölskyldumeðlima sem verða að borga nauðunguraráskriftina vegna sín persónulega og fyrirtækja sinna.“
Segir Steinar um að ræða nauðungaráskrift sem Sjálfstæðisflokkurinn hafi komið á koppinn í einni af mörgum atlögum sínum að eigendum smáfyrirtækja.
„Ofan á það allt borga ég Sigríði Hagalín Björnsdóttur rithöfundalaun. Metsöluhöfundi! Og til að toppa allt saman þá borga ég eiginmanni hennar einnig rithöfundalaun.
Ég vil segja Sigríði Hagalín Björnsdóttur upp! Ég vil verða frjáls frá Sigríði Hagalín Björndóttur! Ég vil ekki taka virkan þátt í heimilisrekstri þeirra hjóna með nauðungaráskriftum og greiðslu rithöfundalauna til þeirra beggja. Er til of mikils mælst?“
