Helga Kristín Kolbeins, formaður Skólameistarafélags Íslands, er ósátt við meðferðina á Ársæli Guðmundssyni, skólameistara Borgarholtsskóla. Eins og greint var frá í vikunni verður hann ekki endurskipaður í starf skólastjóra og verður starf hans auglýst.

Helga er í viðtali í Morgunblaðinu í dag þar sem hún gagnrýnir meðal annars viðbrögð Kristrúnar Frostadóttur forsætisráðherra við málinu.

Sjá einnig: Ekki í fyrsta sinn sem það er fjaðrafok í kringum Ársæl- Kennarar ályktuðu gegn honum og skipunin sögð anga af spillingu

Kristrún sagði í gær að faglegar forsendur byggju að baki þeirri ákvörðun að auglýsa stöðu Ársæls en honum væri frjálst að sækja um aftur.

„Það væri gott að vita hvaða faglegu forsendur það eru. Að þurfa að sækja um aftur er móðgun, því það er enginn sem hefur meiri hæfni,“ segir Helga sem fer fögrum orðum um Ársæl.

„Hann er mikill fróðleiksbrunnur og nýtur mikillar virðingar innan skólameistarahópsins. Hann er mikill kennari í eðli sínu og alltaf tilbúinn að leiðbeina. Hann hefur staðið sína plikt og lent í erfiðum málum sem hann hefur leyst vel úr,“ segir hún en nánar er rætt við Helgu í Morgunblaðinu í dag.