Færeyska þingið hefur samþykkt lög sem heimila utanríkisráðuneytinu að setja þvinganir á rússnesk útgerðarfélög sem starfa í lögsögu eyjanna. Færeyingar hafa verið harðlega gagnrýndir fyrir að fylgja ekki flestum öðrum Evrópulöndum í þvingunaraðgerðum á Rússa.
Eins og segir í frétt Seafood Source um málið þá er löggjöfinni einkum beint gegn rússnesku útgerðarfélögunum Murman Seafood og Norebo sem eru sökuð um njósnir á evrópsku hafsvæði, það er hinn svokallaði skuggafloti Rússa. Evrópusambandið, Norðmenn og Íslendingar hafa þegar sett þvinganir á rússneskar útgerðir.
Færeyingar eru hins vegar mun tengdari Rússum og stunda mun meiri viðskipti við þá en aðrar evrópskar fiskveiðiþjóðir. Nær þetta nána samstarf aftur til ársins 1977. Þess vegna höfðu færeyskar útgerðir áhyggjur af því að þvinganirnar gætu bitnað á færeyskum hagsmunum. Til að mynda að markaðir fyrir færeyskan fisk myndu lokast og að þeir fengju ekki aðgang að Barentshafinu eins og þeir hafa haft.
Rússar hafa þegar brugðist við og greint frá því í rússneska ríkismiðlinum RIA Novosti að Færeyingar megi búast við að Rússar svari aðgerðum þeirra.
