Meðal þeirra sem gáfu skýrslu hjá lögreglu við rannsókn í Súlunesmálsins var afi Margrétar Helgu Hansdóttur Löf, nánar tiltekið stjúpfaðir móður hennar. Hann er nú látinn. Afinn var á heimilinu á afmælisdegi Margrétar, 10. apríl, en daginn eftir lést heimilisfaðirinn, Hans Roland Löf.
Fyrir dyrum stóð afmælisfögnuður Margrétar sem varð 28 ára gömul þann 10. apríl. Þátttaka afans í fögnuðinum varð hins vegar endaslepp, að virðist vegna skapofsa Margrétar.
Afinn gaf skýrslu hjá lögreglu þann 14. apríl, þremur dögum eftir morðið. Hann sagðist fara í mat á hverju laugardagskvöldi hjá fjölskyldunni í Súlunesi og hafi síðast heimsótt þau á afmælisdegi Margrétar, 10. apríl. Hann hefði verið boðaður til kaffiboðs og verið sestur í bókaherbergi um kaffileytið þegar hann heyri hávært orðaskak frá öðrum stað í húsinu. Um 20 mínútum seinna hafi móðir Margrétar komið til hans og sagt að best væri að hann færi heim „og þetta þýði ekki neitt“. Sagðist hann hafa kvatt móðurina og Hans Roland án þess að hitta Margréti. Móðirin hafi hringt í hann daginn eftir og sagt að komið hefði til ósættis og Hans Roland hefði tvívegis farið í hjartastopp.
Ólíkt mörgum öðrum vitnum sagðist afinn ekki hafa orðið vitni að skapbrestum Margrétar og ekki séð hana beita foreldra sína ofbeldi. Hann nefndi hins vegar nýlegt kvöldverðarboð þar sem Hans Roland hefði verið með ullarhúfu á höfði við matarborðið. Honum hafi þótt þetta einkennilegt en ekki fært það í tal. Helgina eftir hefði Hans Roland síðan verið með maráverka. Hefði afinn haft á orði að þetta væri hroðalegt að sjá, móðirin hefði tekið undir þau orð, en málið ekki verið rætt frekar. Hann hefði hins vegar grunað að áverkarnir væru af völdum Margtrétar enda hefði móðir hann sagt að hún „væri mjög erfið stundum í samræðum og þá kannski bara myndi lemja til
þeirra eða eitthvað slíkt“.
