Hjónin Boris og Sofia Gurman hafa verið hyllt sem hetjur eftir að hafa fórnað lífum sínum til að stöðva annan af hryðjuverkamönnunum á Bondi-strönd í Sydney um helgina. Hjónin, sem voru 69 og 61 árs að aldri, réðust til atlögu við eldri hryðjuverkamanninn, Sajid Akram, 50 ára, þegar hann var við það að hefja skothríð, ásamt syni sínum Naveed, á fjölmennan hóp gyðinga sem voru samankomnir á ströndinni til að fagna ljósahátíðinni, hanukkah.
Á myndbandi sem fór í dreifingu á samfélagsmiðlum má sjá augnablikið þegar Boris rífur skotvopn af Sajid skömmu eftir að hann hafði stigið út úr bíl feðganna við ströndina. Sofia fylgir í humátt á eftir eiginmanni sínum og saman börðust þau við Sajid í nokkrar mínútur en loks náði hryðjuverkamaðurinn að komast í annað skotvopn sem hann notaði til að skjóta Boris og Sofiu til bana.
Sést sömuleiðis á myndbandinu hvar Sofia dregur síðustu andartökin þar sem hún liggur ofan á eiginmanni sínum.
Ljóst er að hetjudáð hjónanna töfðu feðganna talsvert en eftir átökin við Gurman-hjónin hluðu þeir að nærliggjandi göngubrú og hófu þar skothríð á mannfjöldann sem heyrðist um alla heimsbyggðina.
Gurman-hjónin voru rússneskir gyðingar frá fyrrum Sovétríkjunum og höfðu þau búið í Ástralíu í áratugi. „Boris var bifvélavirki sem kominn var á eftirlaun, þekktur fyrir örlæti, rólegheit og greiðvikni í samfélaginu. Sofia starfaði hjá Australia Post og var afar vel liðin meðal samstarfsfólks og í samfélaginu öllu,“ sagði í yfirlýsingu frá samtökum gyðinga í Ástralíu.
Alls létust fimmtán almennir borgarar í árásinni, sem er sú mannskæðastu í sögu Ástralíu, og fjörtíu hafi slasast. Elsta fórnarlamb árásarinnar var 87 ára en hið yngsta var hin tíu ára gamla Matilda, sem var yngst. Enn eru tólf hinna slösuðu sagðir í lífshættu.
Talsvert hefur verið fjallað um aðra hetju árásarinnar, hin 43 ára gamla Ahmed Al-Ahmed, múslima frá Sýrlandi sem er faðir tveggja ungra dætra. Hann réðst nokkrum mínútum síðar að Sajid og náði af honum skotvopni hans og bjargaði þar með ófáum mannslífum. Ahmed liggur alvarlega slasaður á sjúkrahúsi en þó ekki í lífshættu.
Forsætisráðherra Ástralíu, Anthony Albanese, hefur staðfest að hann muni hitta Al-Ahmed og sagði að hetjudáð hans „þyrfti að hljóta viðurkenningu“.
Sajid Akram var stuttu síðar skotinn til bana af lögreglu á vettvangi, en sonur hans, Naveed, var handtekinn og liggur á sjúkrahúsi með lífshættulega áverka.
