Glænýr bóksölulisti Félags íslenskra bókaútgefenda sýnir að ekkert lát er á vinsældum Skólastjórans eftir Ævar Þór Benediktsson. Salvar Þór 12 ára skólastjóri hefur setið á fyrsta sæti listans allan október og nóvember, sem og fyrstu tvær vikur desember.
„Skólastjóri Ævars Þórs Benediktssonar situr enn og aftur á toppi Bóksölulistans og hefur þannig slegið öll met, að minnsta kosti frá því ég fór að smíða listann árið 2013,“ segir Bryndís Loftsdóttir framkvæmdastjóri FIBUT.
„Þessar móttökur eru framar björtustu vonum. Þetta er ofboðslega gaman. Ég þakka lesendum kærlega fyrir og vona bara að enn fleiri fái að kynnast Salvari á aðfangadag,” segir Ævar Þór í samtali við DV.
Sjá einnig: Skólastjórinn: Galsafengin þroskasaga fyrir börn og alla sem muna eftir barninu sem þeir voru
Bóksölulistar Félags íslenskra bókaútgefenda frá árinu 2013 eru aðgengilegir á heimasíðu félagsins.
Þegar glæpasögur eru skoðaðar má sjá að Syndafall Yrsu Sigurðardóttur tekur toppsætið af Tál Arnaldar Indriðasonar. Bókakápa Syndafallsins fékk á dögunum tilnefningu til Íslensku bókahönnunarverðlaunanna í flokki kápumynda, Ragnar Helgi Ólafsson hannaði kápuna.
