Sonurinn, Nick Reiner, er í haldi lögreglu vegna gruns um að hafa myrt foreldra sína en þau fundust í blóði sínu á sunnudag. Systir Nicks, Romy, kom að þeim og sagði lögreglu að skoða hugsanlegan þátt bróður síns í morðunum.
Nick er sagður hafa hagað sér furðulega í umræddum gleðskap á laugardagskvöld og raunar verið „algjörlega stjórnlaus“ að sögn sjónarvotta. Er hann sagður hafa verið ör, hlaupið um og spurt fólk hvort það væri frægt.
Greint var frá því í gær að Nick hefði rifist við foreldra sína í gleðskapnum svo eftir var tekið. Rob og Michele eru sögð hafa yfirgefið samkvæmið skömmu síðar og var það í síðasta sinn sem þau sáust á lífi.
Reiner er í haldi án möguleika á lausn gegn tryggingu, en hann var handtekinn eftir að hann tékkaði sig inn á mótel í Santa Monica. Lögregla gerði leit í herberginu hans þar sem töluvert magn af blóð er sagt hafa fundist, þar á meðal í sturtunni, rúminu og á gluggatjöldum.
„Nick var algjörlega stjórnlaus. Hann var sífellt að spyrja fólk hvort það væri frægt,“ segir heimildarmaður People um málið.
Rifrildi hans við foreldra sína er sagt hafa snúist um að hann neitaði að fara enn eina ferðina í meðferð, en að minnsta kosti einn gestur segir að hann hafi virst vera undir áhrifum einhverja efna.
Rob og Michele eru sögð hafa lýst yfir við vini sína að þau hefðu áhyggjur af heilsu sonar síns og andlegt ástand hans virtist vera að versna.
People hefur eftir vini Reiner-hjónanna að Nick hafi átt að vera edrú þetta kvöld, en raunin hafi verið önnur. Segir hann að Nick væri illa háður einhvers konar blöndu af ópíóðum og heróíni.
Annar vinur fjölskyldunnar sagði í samtali við New York Post að Reiner-hjónin hafi virkilega viljað að sonur þeirra fengi hjálp. „En Nick sjálfur vildi fá þessa hjálp heima, hann vildi ekki fara á stofnun.”
