Áform ríkisstjórnarinnar um að stytta atvinnuleysisbótarétt úr 30 mánuðum niður í 18 mánuði hefur víða vakið hörð viðbrögð. Sólveig Anna Jónsdóttir, formaður Eflingar, er þó ekki í hópi fordæmenda breytingarinnar. Kann það að koma á óvart.

Sólveig Anna ræddi þetta í hlaðvarpinu Bjórkastið en Nútíminn birti frétt upp úr viðtalinu.

„Ég ætla bara að droppa einni hérna, að nú til dæmis á að minnka atvinnuleysisbætur úr 30 mánuðum niður í átján mánuði,“ sagði Sólveig Anna og bætti við að viðbrögð verkalýðshreyfingarinnar við þessu hefðu verið undarleg:

„Íslenska verkalýðshreyfingin er trítilóð yfir þessu. Ég persónulega skil ekki yfir hverju hasarinn er.“

Sólveig Anna segir eðlilegt að ræða breytingar á bótarétti þar sem atvinnuleysi á Íslandi sé mjög lágt. Í slíku ástandi sé ekki nauðsynlegt að hafa atvinnuleysisbótarétt 30 mánuði.

„Ef þú ert atvinnulaus í landi þar sem er mjög lítið atvinnuleysi í 30 mánuði, þá mögulega er eitthvað annað sem þú ert að glíma við heldur en bara atvinnuleysi,“ segir Sólveig Anna og ennfremur þetta:

„Íslensk verkalýðshreyfing á að hafa sjálfsöryggi og traustið til þess að geta sagt: ok, það er hægt að lækka bótaréttinn um einhverja mánuði, en við erum sammála um það að ef það kemur hrun eða COVID eða eitthvað ömurð, þá þurfum við að hækka hann aftur.“

Hún segist eiga von á hörðum viðbrögðum við þessari skoðun sinni:

„Nú verð ég sennilega drepin.“