Nefnd um eftirlit með lögreglu hefur komist að þeirri niðurstöðu að ónefndur maður eigi rétt á afsökunarbeiðni og jafnvel bótum eftir að hann var handtekinn á heimili sínu í Hafnafirði í aðgerðum á vegum lögreglunnar á höfuðborgarsvæðinu en það var sérsveit ríkislögreglustjóra sem sá um handtökuna. Upp úr krafsinu kom að maðurinn var ekki skráður til heimilis í húsnæðinu heldur annar aðili sem grunaður var um glæp. Einnig beindist dómsúrskurður um húsleit að röngu húsnúmeri.
Kvörtun var lögð fram til nefndarinnar vegna málsins í apríl síðastliðnum. Sagði maðurinn að hurð á heimilinu hefði verið brotin niður og hann í kjölfarið snúinn niður og handtekinn. Við þetta hafi hann fengið áverka en síðan hefði komið í ljós að lögreglan hefði farið húsavillt.
Nefndin lauk málinu í lok maí en ákvörðun hennar var ekki birt opinberlega fyrr en í seinni hluta októbermánaðar.
Fram kemur að atvikið hafi átt sér stað í mars á þessu ári. Samkvæmt svörum lögreglunnar á höfuðborgasvæðinu barst henni ábending um um að tiltekinn einstaklingur væri með fíkniefni í sinni vörslu til dreifingar. Úrskurður dómara um heimild til húsleitar í íbúð í Hafnarfirði hafi verið fenginn. Hinn grunaði hafi verið skráður með dvalarstað í „kjallara“ í húsnæðinu. Hvers vegna gæsalappir eru notaðar í þessu samhengi kemur ekki fram. Samkvæmt lögreglunni var maðurinn sem var handtekinn á staðnum ekki skráður til heimilis í íbúðinni heldur í öðru bæjarfélagi.
Lögreglan á höfuðborgarsvæðinu sagðist enn fremur að þegar farið hafi verið á vettvang hafi hún notið aðstoðar sérsveitar ríkislögreglustjóra þar sem einstaklingurinn sem handtaka átti hafi verið metinn varhugaverður af lögreglu. Þegar lögregla kom inn í íbúðina hafi fljótt verið ljóst að um rangan einstakling hafi verið að ræða. Hafi hinn handtekni verið látinn laus strax. Lögreglan segist í svörum sínum harma þessi leiðu mistök og bendir á að maðurinn kunni að eiga rétt til bóta.
Í niðurstöðu nefndar um eftirlit með lögreglu kemur fram að dómsúrskurðurinn um húsleitina hafi beinst að röngu húsnúmeri en hvernig það gat gerst er ekki útskýrt nánar. Nefndin segir þetta mjög óheppilegt og að maðurinn hafi orðið fyrir atvikinu sem sé til þess fallið að valda honum verulegu áfalli. Nefndin telur þó að um mannleg mistök hafi verið að ræða en ekki mögulega refsiverða eða ámælisverða háttsemi
starfsmanna lögreglu. Beinir hún að lokum þeim tilmælum til embættis lögreglustjórans á höfuðborgarsvæðinu að maðurinn verði beðinn formlega afsökunar og leiðbeint um rétt sinn til að sækja um bætur.
