Eins og fram hefur komið hafa stjórnendur fréttastofu Sýnar ákveðið að hætta með sjónvarpsfréttatíma um helgar og ráðist var í nokkrar uppsagnir á fréttastofunni. Vísa stjórnendur í rekstrarerfiðleika og mikinn kostnað við að halda úti sjónvarpsfréttum. Meðal þeirra sem sagt var upp er hinn dáði fréttamaður á Suðurlandi Magnús Hlynur Hreiðarsson. Einar Bárðarson athafnamaður lofar Magnús Hlyn í hástert og segir hann einstakan fréttamann og vonist til að hann komi fljótt aftur á skjáinn. Fleiri taka undir með Einari og hvetja til þess að stjórnendur RÚV bjóði Magnús Hlyn velkomin til starfa.
Magnús Hlynur hefur starfað fyrir Sýn undanfarin ár og fyrir löngu öðlast landsfrægð fyrir oft á tíðum óvenjulegar fréttir sínar af Suðurlandi og raunar víðar af landinu. Leggur Magnús Hlynur sérstaka áherslu á jákvæðar en aðeins öðruvísi fréttir. Þykir hann einnig hafa einstakan talanda sem hefur gert hann að vinsælu viðfangsefni hjá eftirhermum.
Í samtali við Mbl.is fór Magnús Hlynur ekki í grafgötur með að hann væri svekktur með uppsögnina en hann hefði undanfarið verið í hálfu starfi hjá Sýn. Magnús Hlynur er með þriggja mánaða uppsagnarfrest en hann segir það enn í skoðun hvernig starfslokum hans hjá Sýn verði háttað.
Þar sem Magnús Hlynur hefur skorið sig nokkuð úr meðal fréttamanna og skapað sér sinn eigin stíl þykir uppsögnin koma þeim mun meira á óvart. Ljóst er að Magnús Hlynur nýtur mikilla vinsælda og áðurnefndur Einar Bárðarson er meðal þeirra sem hafa miklar mætur á honum. Einar skrifar á Facebook:
„Fáir fréttamenn komast á þann stað að vera elskaðir og dáðir. Fréttafólk kemur og fréttafólk fer, margir öðlast gagnlega reynslu á fréttastofum á leiðinni eitthvað annað. Alltof fáir fréttamenn gera það að sínu aðalstarfi alla ævi og leggja metnað sinn í það.“
Magnús Hlynur tjáði Mbl að hann væri nú opinn fyrir nýjum atvinnutækifærum og fór í stuttu máli í viðtalinu yfir menntun sína og hæfileika. Einar segir að hans verði sárt saknað af sjónvarpsskjánum og vonast til að Magnús Hlynur snúi þangað fljótt aftur eftir að starfi hans hjá Sýn lýkur:
„Sýn er að ganga í gegnum erfiða tíma og ætla ég ekki greina það hér eða þykkast vita lausnina á því. En ég held að allir sem horfa á fréttir munu sakna Magga, hans glaðlega viðmóts, einstaka fréttanefns og mannlegu nálgana í sinni efnis öflun.Það er afskaplega fáum fært að fara um samfélagið sitt og gleðja og það að geta það á vettvangi þar sem neikvæðni og æsimennska „selja“ meira – þá er það eins og að bjóða vatn í miðri eyðimörk. Maggi okkur þykir öllum vænt um þig, við sendum þér hlýja strauma – megir þú koma sem fyrst aftur.“
Fjöldi athugasemda hefur verið ritaður við færslu Einars þar sem tekið er undir lof hans í garð Magnúsar Hlyns og margir hvetja til þess að hann verði ráðinn til RÚV en þar starfaði Magnús Hlynur áður en hann var ráðinn til Sýnar. Í því samhengi má velta fyrir sér hvort til að mynda fréttamaður eins og Magnús Hlynur sé ekki bókstaflega gerður fyrir þátt eins og Landann.
