Það hafa komið upp nokkur skipti þar sem blaðamaðurinn er sakaður um að nota gervigreindarforrit við skrif sín, sem hann hefur ætíð neitað staðfastlega fyrir.
„Mig langaði að vita hvort frettir sem eru birtar af Atla Steini Guðmundssyni séu skrifaðar með tækni gervigreindar, en þær innihalda jafnan mjög furðulegt orðalag sem fæstum dytti í hug að nota,“ skrifaði einn áhyggjufullur lesandi í nóvember í fyrra og vísaði í grein sem fjallaði um fyrrum forstjóra Volvo.
Sjá einnig: Lesandi Morgunblaðsins hafði áhyggjur af því að blaðamaður væri gervigreindarforrit
Atli Steinn, sem er búsettur í Noregi, svaraði ásökunum í fyrra með kátínu en þolinmæðin virðist að þrotum komin. Hann var á dögunum aftur sakaður um „gervigreindarskrif“ af manni að nafni Gretar Örn á Facebook vegna fréttar hans: Les útlendingum pistilinn um íslenska hringtorgið.
„Ég hefði nú haft gervigreindarskrif í einu orði, samsett nafnorð sem auk þess ber fleirtöluendingu. Ætti þá ekki að standa „eru“ frekar en „er“? Vesalings Gretar Örn, algjörlega óskrifandi á íslenska tungu, veit greinilega ekki betur,“ skrifar Atli Steinn um málið á Facebook-síðu sinni og heldur áfram:
„Hvort er þá á ferð, gervigreind eða ekta heimska í hans tilfelli? Þetta er í fjórða skipti á stuttum tíma sem íslenskir fávitar saka mig um gervigreindarskrif, fávitar á borð við Gretar Örn og málfræðilegu mannvitsbrekkurnar í „Málvöndunarþættinum“ og fleiri haturshópum á Facebook þar sem sama kerlingin hefur ráðist á mig oftar en einu sinni og blessuð fylgispöku lömbin í hópnum segja ekki annað en „Æ, æ“, fólk sem aldrei hefur tjáð sig með einu orði um málfræði eða málvísindi, bara hjörð sem segir „Æ, æ“. Hvers vegna heitir þessi hópur ykkar ekki bara „Æ, æ“?“
Atli Steinn skorar á manninn að hitta sig næst þegar hann kemur til Íslands.
„Það verður í apríl næstkomandi. Þá skaltu horfa í augun á mér, bölvað óbermið þitt, og segja það framan í mig að ég skrifi gegnum gervigreind. Ég hreinlega get ekki beðið…sem betur fer er ég ekki prestur þá. Sakið mig bara einu sinni enn um að skrifa gegnum gervigreind helvítis sauðirnir ykkar, stór í kjaftinum bak við lyklaborðið eins og alltaf. Aðeins minni augliti til auglitis. Megið þið kafna á ykkar gervigreindarmálfræði, ég skal míga á gröfina ykkar með mestu gervigreindaránægju.“
