Fyrir mörgum eru klementínur frá framleiðandanum Robin ómissandi í aðdraganda jólanna og um jólin. DV hafa borist ábendingar um að þessi vinsæla tegund verði ekki fáanleg í verslunum landsins fyrir þessi jól. Jóhanna Jónsdóttir, framkvæmdastjóri Banana ehf, sem hafa flutt inn Robin klementínur í gegnum árin, staðfestir þetta og er ástæðan uppskerubrestur í framleiðsluhéraðinu vegna flóða.

Jóhanna segir í svari sínu við fyrirspurn DV um málið að orsökin liggi í uppskerubresti sem varð vegna flóða í Valencia á Spáni á síðasta ári. „Þá verða hinar sívinsælu klementínur því miður ekki í boði fyrir þessi jól,“ segir hún.

„Kementínurnar hafa notið gríðarlegra vinsælda meðal Íslendinga síðustu fjóra áratugi, ekki síst yfir hátíðarnar, þar sem margir tengja ilm, bragð og jólastemningu við Robin klementínur,“ segir Jóhanna ennfremur en segir þó ekki ástæðu til að örvænta, klementínuilmur mun fylgja jólunum nú sem endranær:

„Við getum þó glatt landsmenn með því að tilkynna að mandarínur frá öðrum ræktendum í Valencia héraðinu eru á leiðinni í verslanir Bónus og Hagkaup í lok nóvember í sambærilegum gæðum og Robin. Enginn þarf því að missa af klementínuilminum sem fylgir jólunum.“