Sjötíu íslenskum hálf villtum hestum hefur verið bjargað í Devon sýslu í Bretlandi. Verkefnið hefur staðið yfir í meira en eitt ár og sumir hestanna voru mjög illa haldnir.
Bresku dýravelferðarsamtökin RSPCA hafa í samvinnu við nokkur hrossaverndunarsamtök bjargað sjötíu villtum íslenskum hestum í Devon sýslu. Devon er í suðvestur hluta Englands, á Cornwall skaga.
Eins og segir í frétt blaðsins Tavistock Times Gazette hefur aðgerðin staðið yfir í 15 mánuði. Í maí mánuði árið 2024 vöktu hrossaverndunarsamtökin The Mare and Foal Sanctuary í Devon og World Horse Welfare athygli á voveifleigum aðstæðum íslenskra hrossa á stóru svæði.
Ekki kemur fram hvers vegna þessi hross voru hálf villt eða hvað þau höfðu verið þarna lengi. En ljóst var að hrossin höfðu verið lengi eftirlitslaus, bæði hestar og merar, og höfðu orðið til all nokkur folöld án eftirlits.
Þá voru einnig nokkrar merarnar fylfullar en í nálægð við graðhesta sem voru í sífelldum slagsmálum. Voru sum hrossin mjög illa haldin, jafn vel með lífshættulega áverka.
Eigandi hestanna, sem hafði vanrækt þau algerlega, afsalaði sér eignarhaldi yfir þeim. Hefur hann ekki verið nafngreindur, né búgarðurinn sem hann á. Að sögn RSPCA stendur ekki til að lögsækja eigandann fyrir vanræksluna eða beita sér á neinn annan hátt gegn honum.
Auk RSPCA komu þrjú hrossaverndunarsamtök að aðgerðinni með því að útvega búnað, mannskap og sérfræðiþekkingu. Það er The Donkey Sanctuary, Redwings Horse Sanctuary og Blue Cross. Þegar hefur nokkrum hrossanna verið komið fyrir á nýjum heimilum.
Dýralæknar fylgdust með og tóku þátt í aðgerðinni, sem fór fram eftir ströngustu öryggisstöðlum. Fyrst voru verst höldnu dýrin fjarlægð, þá merar og folöld sem þurftu aðstoð sérfræðinga, þá graðhestarnir og síðust heilbrigðar merar og folöld. Eins og áður segir tók þetta 15 mánuði. Verkefninu lauk í lok sumars þegar öllum hrossunum hafði verið bjargað.
„Mér er ákaflega létt að öllum hrossunum hafi verið bjargað,“ sagði Leah Brock hjá hrossaverndarsamtökunum The Mare and Foal Sanctuary eftir að aðgerðinni lauk. „Það hefur verið auðmýkjandi að sjá hvernig góðgerðarfélögin stigu fram án þess að hika og buðu fram tíma, fjármuni og sérfræðiþekkingu til þess að tryggja að þessi hross fengju þá umönnun sem þau þurftu.“
„Við hvetjum almenning til að vinna með okkur, fylgja reglum og stýra velferð dýra sinna á réttan hátt og leita eftir aðstoð þegar þarf,“ sagði Sarah Morris hjá RSPCA.
Íslenskir hestar hafa verið fluttir út í stórum stíl en þeir eru ekki algengir í Bretlandi. Aðeins er talið að þeir séu í kringum 1.000 í landinu og því voru íslensku hrossin í þessari aðgerð stór hluti af heildinni.
