Iris Stalzer, sem nýlega var kjörin bæjarstjóri í bænum Herdecke í Þýskalandi, berst nú fyrir lífi sínu á sjúkrahúsi eftir að hafa verið stungin. Sonur hennar kom að móður sinni mikið slasaðri í íbúð hennar í Herdecke-Herrentisch í morgun.

Þýska blaðið Bild greinir frá þessu.

Iris er sögð hafa verið stungin í kvið og bak og leitar lögregla nú að „nokkrum” mönnum sem grunaðir eru um að hafa ráðist á hana.

Lögregla hefur biðlað til fólks að hafa samband búi það yfir vitneskju um árásina eða árásarmennina. Hún hefur ekki útilokað að um pólitískar ástæður liggi að baki voðaverkinu.

Stalzer er í þýska jafnaðarmannaflokknum SPD og var hún kjörin bæjarstjóri í lok september þar sem hún hlaut 52,2% atkvæða. Átti hún að taka við starfinu þann 1. nóvember.

Iris er gift móðir tveggja barna á unglingsaldri, lögfræðingur að mennt og hefur hún búið í Herdecke nær allt sitt líf.