Starfsmanni Nettó á Ísafirði hefur verið sagt upp störfum vegna ítrekaðs þjófnaðar úr versluninni. Hafði hann bætt þýfinu á reikninga viðskiptavina en aðallega virðist hafa verið um að ræða sígarettur.
RÚV greinir frá málinu. Segir í fréttinni að maðurinn hafi framið þessa þjófnaði sína frá því í júní og fram í miðjan október. Er talið að hann hafi gert þetta um 40 sinnum á hverjum mánuði. Maðurinn mun hafa fest strikamerki af sígarettupakka á hönd sína og skannað það þegar hann var að skanna vörur á afgreiðslukassa, sem viðskiptavinir voru að kaupa.
Mun málið hafa loks komist í hámæli þegar viðskiptavinur sem varð fyrir þessu uppgötvaði hvað maðurinn hafði gert og greindi frá því á samfélagsmiðlum. Samstarfsfólk mannsins vissi hins vegar af athæfi hans og varaði hann margsinnis við en hann hætti þessu aðeins tímabundið.
Í upprunalegri útgáfu fréttarinnar kom fram að verslunarstjóri verslunarinnar hefði vitað af þjófnaði mannsins og einnig verið sagt upp störfum vegna málsins. Það byggði á frétt RÚV um málið en miðillinn hefur nú leiðrétt frétt sína. Verslunarstjórinn vissi ekki af þjófnaði mannsins og var ekki sagt upp störfum vegna málsins en hann hætti störfum að eigin frumkvæði í síðasta mánuði.
