Gos á Vesturlandi, jafnvel nálægt byggð, er raunhæfur möguleiki i náinni framtíð, ef marka má viðtal Bylgjunnar við Þorvald Þórðarson eldfjallafræðing. Skjálftavirkni hefur verið í Ljósufjallakerfinu undanfarið en það teygir sig yfir stórt svæði, yfir um 90 km, frá Grábrók og vestur í Berserkjahraun. Grábrók er við hliðina á Bifröst í Borgarfirði en Berserkjahraun er mitt á milli Stykkishólms og Grundarfjarðar.

Bylgjufólk spurði Þorvald hvað væri í gangi í Ljósufjöllum núna.

„Það sem menn hafa verið að sjá er undir Grjótavatni, þá hefur verið skjálftavirkni sem byrjaði í nóvember á síðasta ári, á svona 20 km dýpi.“

Hvað þýðir það?

„Það þýðir í rauninni – það þýðir náttúrulega ýmislegt, en það er í neðri skorpunni, frekar neðarlega og frekar djúpt. Og þetta er þá kvika sem hefur verið að koma að neðan, af enn meira dýpi. Úr möttlinum og safnast þarna fyrir. Það er eins og þetta hafi byrjað þarna í nóvember og síðan hefur þessi skjálftavirkni verið að færast dálítið upp á við, hún er komin upp á 10 km dýpi.“

Er kvikan að brjóta sér leið upp á yfirborðið?

„Hugsanlega. Mér finnst þetta allt benda til þess, við fengum þarna smá órópúls og annað sem bendir til þess að það er kvika þarna á hreyfingu sem er að reyna að færa sig ofar í skorpuna. Við vitum það líka frá fyrri rannsóknum að kvika á þessu svæði og Snæfellsnesinu, hún safnast fyrst á 20 km dýpi, síðan færir hún sig upp á 10 km dýpi og þegar hún er komin þangað þá hefur hún tendens til að koma beint upp. Sviðsmyndin er þannig að það er allt sem bendir til þess að kerfið sé að búa sig undir eldgos, hvort sem þetta endar í eldgosi eða ekki. En það er allavega komið af stað.“

Síðast gaus á svæðinu skömmu eftir landnám.

Viðtal Bylgjunnar við Þorvald má hlýða á hér.