Inga Sæland félags- og húsnæðismálaráðherra og formaður Flokks fólksins hefur beðist afsökunar á umdeildu símtali við skólameistara Borgarholtsskóla. Neitar hún því þó að hafa kynnt sig sem ráðherra í símtalinu og að hún myndi beita áhrifum sínum.

Inga sagði þetta í samtali við RÚV eftir ríkisstjórnarfund í dag.

Símtalið snerist um skó barnabarns Ingu sem týnst höfðu í skólanum, þar sem barnabarnið er nemandi, en skórnir komu þó á endanum í leitirnar.

Inga viðurkenndi að hafa hringt í skólameistarann og að það hafi verið fljótfærni sem muni ekki endurtaka sig. Hún biður skólameistarann afsökunar. Inga segist gera sér grein fyrir að það fylgi því mikil ábyrgð að vera ráðherra í ríkisstjórn Íslands en hún hefur verið sökuð um að hafa misbeitt valdi sínu í málinu.

Inga neitar því hins vegar að hafa kynnt sig sem ráðherra í símtalinu og að hafa ýjað að því að hún myndi beita áhrifum sínum vegna hvarfs skónna.