Áslaug Arna Sigurbjörnsdóttir, fyrrverandi ráðherra, býður sig fram til formennsku í Sjálfstæðisflokknum. Þetta tilkynnti hún nú fyrir skemmstu í Sjálfstæðissalnum við Austurvöll.
Að Snorra Ásmundssyni, listamanni, er Áslaug Arna sú fyrsta sem tilkynnir framboð í flokknum eftir að Bjarni Benediktsson tilkynnti að hann hygðist ekki sækjast eftir endurkjöri á landsfundi flokksins í lok febrúar.
Guðlaugur Þór Þórðarson hefur verið sterklega orðaður við framboð. Hann var í löngu viðtali í útvarpsþættinum Sprengisandi á Bylgjunni í morgun en ekkert fékkst upp úr honum varðandi hugsanlegt framboð til formanns. Hann hefur áður boðið sig fram og fengið 40 prósent atkvæða.
Guðrún Hafsteinsdóttir er einnig sterklega orðuð við framboð. Þórdís Kolbrún R. Gylfadóttir og Jón Gunnarsson hafa tilkynnt að þau ætli ekki að bjóða sig fram.
