Verkið var í eigu hollenska listaverkasalans og gyðingsins Jacques Goudstikker þegar nasistar hertóku landið. Þeir stálu verkinu og hafði það ekki sést síðan.
Breska blaðið Guardian greinir frá því að verkið hafi fundist eftir að fasteignaauglýsing birtist á netinu fyrir skemmstu. Var verkið upp á vegg fyrir ofan sófa í húsi í argentínskum strandbæ.
Í frétt Guardian kemur fram að blaðamenn hollenska blaðsins AD hafi árum saman reynt að rekja ferðir verksins, meðal annars með því að fara í gegnum gömul stríðsskjöl. Þá hafi þeir bankað upp á hjá afkomendum nasistans sem tengdist hvarfi þess á sínum tíma.
Goudstikker átti mjög stórt safn af listaverkum, eða um 1.100 verk, og var það selt með valdi til nasistaleiðtogans Hermanns Göring skömmu eftir að Goudstikker flúði frá Hollandi árið 1940. Á undanförnum áratugum hefur tekist að endurheimta mörg verkanna en í gegnum árin hefur það verið ráðgáta hvað varð um þetta tiltekna verk eftir Ghislandi.
Vísbendingar voru uppi um að verkið hefði endað hjá Friedrich Kadgien, SS-liða og einum af aðstoðarmönnum Görings, en Kadgien fluttist til Suður-Ameríku eftir að heimsstyrjöldinni lauk.
Í frétt Guardian kemur fram að blaðamenn AD hafi reynt að ná sambandi við afkomendur Kadgien í Buenos Aires, meðal annars með því að banka upp á en enginn hafi komið til dyra. Það var síðan þegar umrætt hús fór á sölu fyrir skemmstu að verkið sást í fasteignaauglýsingunni sem fór á netið. Hékk það fyrir ofan sófa í húsinu og virtist það vera í góðu standi.
Í frétt Guardian er haft eftir listfræðingum að allar líkur séu á því að þetta sé verkið sem leitað hefur verið að. Benda þeir þó á að aðeins skoðun á verkinu geti staðfest að ekki sé um eftirmynd að ræða. Í kjölfar uppgötvunarinnar gerði argentínska lögreglan húsleit í villunni, að því er AP greinir frá. Málverkið var þó horfið þegar lögreglan kom á staðinn, en rannsókn málsins stendur yfir.
