Á tólfta tímanum voru björgunarsveitirnar Dagrenning á Hvolsvelli, Flugbjörgunarsveitin á Hellu og Bróðurhöndin undir Eyjafjöllum boðaðar út á mesta forgangi vegna tilkynningar til Neyðarlínu um ferðamann sem hafði fallið niður nokkurn bratta á leið að Merkurkeri.

Merkurker er við Þórsmerkurleið og hafði viðkomandi runnið niður nokkra brekku niður að Sauðá og var grunur um ökklabrot.

Björgunarfólk ásamt sjúkraflutningamönnum áttu nokkuð greiða leið að viðkomandi, búið var um ferðamanninn á börum til flutnings í bíl.

Björgunarfólk óð Sauðá með börurnar og gekk svo fram gilið ríflega 100 metra að bílum.

Viðkomandi var svo fluttur með sjúkrabíl til aðhlynningar.

Björgunarsveitir höfðu lokið sinni vinnu á vettvangi upp úr klukkan 12.