Vilhjálmur gerir þetta að umtalsefni á Facebook-síðu sinni og bendir á að krónan hafi styrkst um 11% gagnvart Bandaríkjadollar og 3% gagnvart evru síðasta árið.
„Samt lækkar ekkert. Ekki matur. Ekki raftæki. Ekki bensín. Ekki lyf. Ekki neitt. En þegar krónan veikist? Þá hækka verðin strax. Krónan veikist – og bensín hækkar. Krónan veikist – og flugfargjöld hækka. Krónan veikist – og innfluttar vörur skjóta upp kollinum,“ segir Vilhjálmur og heldur áfram:
„En þegar krónan styrkist? Þá gerist ekki neitt. Verðin standa í stað. Þögn. Verðhækkanir eru sjálfvirkar – verðlækkun er óhugsandi.“
Hann bætir við að svo skilji enginn af hverju verðbólga lækkar ekki, af hverju vaxtahækkanir skila sér ekki og af hverju lífskjör batna ekki þrátt fyrir góðar hagtölur.
„Kannski af því að styrking krónunnar skilar sér aldrei til almennings. Og enginn virðist ætla að spyrja af hverju,“ segir hann og veltir því upp hvort Seðlabankinn og stjórnvöld ættu að skipa rannsóknarnefnd til að komast að því hvernig þetta hagkerfi okkar virkar, þar sem krónan má veikjast aftur og aftur en ekki styrkjast í vasa fólksins.
Margir leggja orð í belg við færslu Vilhjálms og benda einhverjir á að fleiri breytur þurfi að taka inn í dæmið. Þannig hafi launahækkanir sín áhrif og mikill vaxtakostnaður vegna verðtryggingar á almenning.
