„Við erum núna komin með báðar kærurnar til okkar. Við erum bara að yfirfara gögnin núna og hún er á frumstigi, rannsóknin,“ segir Unnar Már Ástþórsson, aðalvarðstjóri hjá lögreglunni á höfuðborgarsvæðinu, í viðtali við DV um hið svokallaða díeselolíumál.

Unnar upplýsir að nú sé búið að kæra tvö brot af þessu tagi. Annars vegar er þar um að ræða stórþjófnað á díselolíu af athafnasvæði Fraktlausna en eigandi fyrirtækisins birti um helgina myndband af verknaðinum.

Hins vegar greindi ónefndur vörubílstjóri frá því í gær að hann hefði staðið eldsneytisþjóf að verki er hann var að tappa díselolíu af vörubíl hans. Bílstjórinn hélt eftir bíllyklum þjófsins og nafngreindi hann bæði á Facebook-síðu sinni og til lögreglu.

Bíll sem notaður var við þjófnaðinn hjá Fraktlausnum stendur á bílastæði við Seljakirkju í Breiðholti, að því er RÚV greinir frá. Er bíllinn fullur af bensínbrúsum og í honum er gaskútur. Íbúar í nágrenninu hafa áhyggjur af eldhættu vegna bílsins.

Tekur ekki afstöðu til kæru hins meinta þjófs

Arnar Þór Ólafsson, framkvæmdastjóri Fraktlausna, hefur lýst mikilli óánægju með vinnubrögð lögreglu í málinu en hann greindi frá því í gærkvöld að eigandi bílsins sem notaður var til verksins hafi kært hann fyrir hótanir. Hafi hann haft samband við manninn og beðið hann um að skila sér þýfinu, mörg hundruð lítrum af díselolíu. Maðurinn hafi játað í fyrstu en síðar sagst vera saklaus og að bílnum hafi verið stolið frá honum.

Fór maðurinn síðan til lögreglu og kærði Arnar fyrir hótanir. Lögregla hafði samband við Arnar í gær og greindi honum frá þessu, að hans sögn í ávítunartóni.

Sjá einnig: Framkvæmdastjóri Fraktlausna kærður fyrir hótanir í garð díselolíuþjófs – „Eina sem skiptir máli eru réttindi glæpamanna“

Unnar segir að eigandi bílsins sé sjálfkrafa sakborningur í málinu. Alveg eigi eftir að meta og sannreyna framburð hans um að hann sé saklaus og bílnum hafi verið stolið af honum.

„Það er alltaf þannig að ef það kemur ökutæki og það er skráður eigandi þá hefur hann réttarstöðu sakbornings á meðan rannsókn er í vinnslu og svo kannski breytist hún á síðari stigum. Það er ekki komið á það stig, á eftir að yfirheyra hann um hans hlutdeild í málinu og sannreyna hvort hann eigi við rök að styðjast.“

Unnar segir að lögregla virðist hafa góð gögn í höndunum en þó hafi hann ekki kynnt sér frumgögn í Fraktlausna-málinu en „miðað við það sem maður hefur séð í fjölmiðlum þá virðast þetta vera góð gögn“.