Sex tonna afrískur fíll drap milljarðamæring á landareign hans í Suður Afríku. Maðurinn var að reyna að bægja hjörð fíla frá ferðamannabústöðum þegar einn réðist á hann og kramdi með fótunum og hornunum.

Breska blaðið The Daily Star greinir frá þessu.

Maðurinn hét F.C. Conradie og var 39 ára gamall. Hann átti og rak fimm stjörnu veiðilendur og hótel í Gondwana við suðurströnd Suður Afríku, skammt frá Höfðaborg. Conradie lést í gærmorgun eftir árás fíls.

Ekki liggur alveg fyrir hvernig árásin átti sér stað. En talið er að Conradie hafi verið að bægja fílahjörð frá ferðamannabústöðum á jörðinni þegar stórt karldýr hafi ráðist á hann. Fyrst slegið hann með hornunum og síðan traðkað á honum með fótunum þangað til Conradie lést.

Málið er ekki einsdæmi á jörðinni en 36 ára gamall leiðsögumaður, David Kandela, lést þar eftir árás fíls á síðasta ári. Kandela var að reka hjörð fíla þegar ein kýrin réðst skyndilega á hann og rak á hol með hornunum í nokkur skipti. Þá dró hún hann inn í runna og þar komu fleiri fílar til þess að taka þátt í árásinni. Slitu þeir af honum báðar hendurnar og báðar fæturna.

Málið hefur vakið óhug en jörðin er vinsæll safarí staður hjá ríku fólki. Auk fíla eru þar meðal annars ljón, hlébarðar, nashyrningar og vatnabuffalar. F.C. Conradie skilur eftir sig eiginkonu og þrjá unga syni.