Neytendastofa hefur haft til skoðunar upplýsingagjöf og viðskiptahætti Isavia ohf. vegna skammtímabílastæða á Keflavíkurflugvelli. Hefur stofnunin komist að þeirri niðurstöðu að Isavia hafi brotið lög hvað þetta varðar.
Segir meðal annars í ákvörðun Neytendastofu að Isavia hafi gerst sekt um villandi viðskiptahætti með því að láta líta út fyrir að sjálfvirkt greiðslukerfi væri til staðar en ekki tekið fram að virkja þurfi það sérstaklega. Þá hafi neytendum ekki verið veitt fullnægjandi upplýsingar um öll gjöld tengd gjaldtengdum bílastæðum félagsins. Í tilkynningu Neytendastofu segir:
„Neytendastofa komst að þeirri niðurstöðu að Isavia hafi brotið gegn lögum um góða viðskipthætti sem og reglum um verðmerkingar með því að veita neytendum ekki fullnægjandi upplýsingar um öll gjöld tengd gjaldskyldum svæðum félagsins. Þá var það álit stofnunarinnar að með hliðsjón af staðsetningu myndavéla, skorti á upplýsingum um að þjónustugjald leggist á eftir 5 mínútna viðveru og að teknu tilliti til þess þrönga tímaramma sem neytendum er gefinn til afferminga, sé tilhögun gjaldtöku í brottfararrennu Isavia viðskiptahættir sem séu óréttmætir gagnvart neytendum. Þá komst stofnunin einnig að þeirri niðurstöðu að Isavia hafi viðhaft villandi viðskiptahætti með því að láta líta út fyrir að sjálfvirkt greiðslukerfi/gjaldtaka væri til staðar án þess að tekið væri fram að virkja þurfi það sérstaklega.“
Hefur Neytendastofa sektað Isavia um 500 þúsund krónur vegna þessara brota.
Sjá nánar hér.
