Rannsakendur Air India-flugslysins, sem átti sér stað þann 12. júní síðastliðinn í borginni Ahmedabad í vesturhluta Indlands, hafa komist að þeirri niðurstöðu að flest bendi til þess að flugmenn vélarinnar hafi orðið þess valdandi að flugvélin fórst og 260 manns létust. 242 einstaklingar voru um borð í vélinni en einn þeirra lifði slysið af eins og frægt varð. Nítján í viðbót létust þegar flugvélinn skall á þéttbýlt íbúahverfi.

Ekkert virðist hafa verið að flugvélinni sjálfri, sem var af gerðinni Boeing 787 Dreamliner, en hins vegar virðist sem svo að skömmu eftir flugtak hafi verið slökkt á rofa sem stýrir eldsneytisflæði að hreyflum flugvélarinnar. Á þeim slokknaði skömmu eftir flugtak með þessum hörmulegu afleiðingum.

Ekki liggur þó enn fyrir hvort að um mistök flugmannanna hafi verið að ræða eða hvort að slökkt hafi verið á rofanum af yfirlögðu ráði.

Daily Mail fjallar um málið en í umfjölluninni kemur fram að skýrsla rannsóknarnefndarinnar hafi verið lögð fyrir indversk flugmálayfirvöld en óljóst sé hvort hún komi fyrir sjónir almennings.

Yfirflugstjóri vélarinnar, Sumeet Sabharwal, var þaulreyndur og átti meira en 10 þúsund flugtíma að baki á breiðþotum. Aðstoðarflugmaðurinn, Clive Kunder, átti 3.400 flugtíma að baki á slíkum þotum.

Flugslysið var fyrsta slysið sem Dreamliner-vél Boeing lendir í og var mikið áfall fyrir bandaríska flugrisann sem hefur gengið í gegnum öldudali undanfarin ár. Bandarísk flugmálayfirvöld hafa aðstoðað við rannsókn málsins en þar á bæ ríkir orðið mikil gremja í garð indverskra flugmálayfirvalda varðandi það hversu langan tíma það hefur tekið að rannsaka svarta kassa flugvélarinnar.