Í nýlegum úrskurði úrskurðarnefndar um upplýsingamál er beiðni um upplýsingar um vörslu gagna vísað frá nefndinni. Í niðurstöðu nefndarinnar kemur fram að beiðninni er vísað frá á þeim grundvelli að nefndin telur erind­ið ekki bera með sér að vera beiðni um fyrirliggjandi gögn í skilningi upplýsingalaga, heldur beiðni um upp­lýsingar um hvernig vörslu gagna sé háttað innan ráðuneytisins. Ekki er þess getið í úrskurðinum um hvaða ráðuneyti er að ræða.

Það sem vekur athygli í úrskurðinum er að svo virðist sem trúnaðargögn um þá einstaklinga sem kæra til nefndarinnar liggi á glámbekk í ráðuneytinu.

Það liggur fyrir að trúnaðarupplýsingar um mál sem við sendum til ráðuneytisins eru geymd­ar í opnum, glærum plastvasa þvert á óskir okkar og samþykki fyrir slíkri vinnslu upp­lýsinga. […] því vantar okkur upplýsingar um:

• Hvar hefur plastvasinn verið geymdur frá því að gögnin voru prentuð út í októ­ber 2024.
• Ef plastvasinn er geymdur í skáp óskum við eftir ljósmynd af skápnum, ef hann er ekki geymdur í skáp óskum við eftir ljósmynd af staðsetningunni þar sem hann hefur verið geymdur.
• Ef plastvasinn er geymdur í læstum skáp óskum við eftir upplýsingum um hvern­ig honum er læst og hverjir eru með og hafa haft aðgang að skápnum (þ.e. lykil eða lykilorð).
• Hversu mörg trúnaðarmál eru geymd í opnum glærum plastvösum hjá ráðu­neyt­inu.
• Hversu mörg mál eru geymd í sama skáp eða öðrum geymslustað þar sem okkar mál er.
• Hvaða rými innan ráðuneytisins er geymslustaður plastvasans í (sic) og hverjir eru með og hafa haft aðgang að því rými.

Eins og áður sagði taldi nefndin beiðnina ekki vera beiðni um gögn í skilningi upplýsingalaga, heldur beiðni um upp­lýsingar um hvernig vörslu gagna sé háttað innan ráðuneytisins. Af þeim sökum var kær­unni vísað frá ­nefnd­inni.