Sumir ferðamenn sem koma til Íslands vilja að aldurstakmark verði sett á Bláa lónið. Það eyðileggi spa-upplifunina að þriggja ára krakkar hlaupi um, æpandi og skvettandi.
„Ég veit að þessi svæði eru fyrir alla og ég býst við því að sjá fjölskyldur við fossa og á veitingastöðum á Íslandi. En ég var að horfa á myndband frá Bláa lóninu í gær og það var fullt af þriggja ára krökkum hlaupandi um og skvettandi,“ segir upphafsmaður umræðunnar um málið á samfélagsmiðlinum Reddit. Hafa skapast miklar umræður um málið á vettvangi fyrir erlenda ferðamenn.
Ferðamaðurinn segir að þetta eyðileggi spa-upplifunina á að fara í Bláa lónið.
„Að það væri til einn staður þar sem fólk kæmi ekki með lítil börn. Þau voru að hlaupa inn og út úr gufuböðum. Það væri vont að borga fyrir þetta og reyna að slaka á í gufunni með krakka í kútum hlaupandi út um allt,“ segir hann.
Taka sumir undir þetta. Það er að lón eins og Bláa lónið séu engir staðir fyrir börn.
„Mér finnst allt of margir fara þangað með smábörnin sín,“ segir einn. „Ég hefði aldrei farið með son minn þangað fyrr en hann væri orðinn tíu ára svo hann myndi læra eitthvað af þessu. Ég fór snemma á þessu ári með eiginkonu minni og þetta var góður fullorðinstími, við þurfum á því að halda.“
„Hlaupandi út um allt og mígandi. Ég er sammála því að það ættu að vera dagar þar sem aðeins fullorðnir mega koma. Þetta er ekki vatnsleikjagarður,“ segir annar.
Aðrir koma börnunum til varnar. Nefna að þau séu ekki aðalvandamálið á svona stöðum.
„Bláa lónið er risastór sundlaug með einangruðum svæðum. Það er rólegt svæði og starfsmaður fylgir reglunum eftir. Þú ættir ekki að lenda í neinum vandræðum með að komast frá krökkum ef þú vilt,“ segir einn netverji.
„Mér finnst Instagrammararnir miklu meira pirrandi en börnin og svo eru sumir fullorðnir sem haga sér eins og börn,“ segir annar sem bendir á að Bláa lónið sé mjög stór staður sem þúsundir heimsækja á hverjum degi.
„Bláa lónið er nógu stórt til að geta komist hjá aðstæðum sem þessum. Það er nóg pláss fyrir alla,“ segir sá þriðji. „Ég kýs miklu frekar að vera í kringum vel uppalin börn en hóp af fullum ferðamönnum eða áhrifavöldum að taka myndir af öllum.“ Þá nefnir hann einnig að Bláa lónið er talið vera gott fyrir fólk með húðvandamál þannig að börn ættu að hafa aðgang að því eins og fullorðnir.
