Ferðamaður sem leitað var að í Öræfum á föstudag fannst látinn. Þetta kemur fram í tilkynningu Lögreglunnar á Suðurlandi.

„Lögreglu á Suðurlandi barst aðstoðarbeiðni um kl. 22 sl. föstudagskvöld frá erlendum ferðamönnum sem dvöldu í Öræfum. Ferðamennirnir óskuðu aðstoðar við leit að 19 ára samferðamanni sem hafði farið í göngu við Svínafell og ekki komið til baka innan eðlilegra tímamarka miðað við áætlun,“ segir í tilkynningu.

Björgunarsveit var kölluð út sem og þyrla Landhelgisgæslunnar. Eftir skamma leit í krefjandi landslagi fannst ferðamaðurinn látinn. Var hann fluttur af björgunarsveitarfólki og áhöfn þyrlunnar af vettvangi.

„Lögreglan á Suðurlandi hefur atvikið til rannsóknar. Ekkert hefur komið fram sem bendir til annars en að maðurinn hafi látist af slysförum,“ segir í tilkynningu.