Mannanafnanefnd hefur samþykkt nokkurn fjölda nýrra mannanafna sem tekin voru fyrir á fundi nefndarinnar þann 24. júní síðastliðinn.

Ætla má að áhugamenn um tölvuleiki og knattspyrnu séu himinlifandi því að nú geta íslenskir karlmenn tekið upp eiginnöfnin Link og Baggio. Þá voru eiginnöfnin Bíi (kk), Celina (kvk), Míló (kk), Eugenía (kvk), Anóra (kvk), Sesselíus (kk), Vava (kvk), Kareem (kk) og Star (kvk) einnig samþykkt.

Link er aðalsöguhetjan í tölveikjunum Zeldu, sem skemmt hafa landsmönnum í áratugi, og knattspyrnugoðið Roberto Baggio vann sér sess í hjörtum margra þegar hann leiddi Ítalíu í úrslitaleikinn á HM 1994, þar sem þeir bláklæddu þurftu reyndar að lúta í gras gegn ógnarsterku liði Brasilíu.

Rökstuðningurinn varðandi samþykkt Link-nafnsins er einfaldlega sá að það tekur íslenska eignarfallsendingu, Links, og brýtur ekki gegn rithefðum íslenskunnar né er það talið valda neinum ama að bera nafnið. Baggio uppfyllir ekki sömu skilyrði en bent er á að um sé að ræða ítalskt tökunafn sem uppfyllir eftirfarandi lagaskilyrði að mati nefndarinnar:

„Þrátt fyrir að ekki sé hefð fyrir tökunafni á grundvelli framanritaðs telst ritháttur þess hefðbundinn sé hann gjaldgengur í veitimáli og nafnið ekki ritháttarafbrigði rótgróins nafns. Þó er áskilið að nöfn skulu rituð með bókstöfum íslenska nútímastafrófsins eða bókstöfunum c, q, w og z. Heimilt er að laga tökunafnið að almennum íslenskum ritreglum.“

Hér má lesa úrskurði Mannanafnanefndar og kynna sér rökstuðning nefndarinnar.