Þingfesting var í Gufunesmálinu svokallaða við Héraðsdóm Suðurlands í morgun. Þar eru þrír menn sakaðir um að hafa orðið Hjörleifi Hauki Guðmundssyni að bana en hann lést eftir hrottalegar misþyrmingar.
Fjórir karlmenn og ein kona eru ákærð í málinu, þar af eru þrír, Stefán Blackburn, Lúkas Geir Ingvarsson og Matthías Björn Erlingsson, ákærðir fyrir manndráp, frelsissviptingu og rán. Auk þess eru ungur maður og ung kona ákærð fyrir peningaþvætti og hlutdeild í frelsissviptingu og ráni.
Allir sakborningarnir fimm neita sök í málinu.
Aðalmeðferð í málinu hefur ekki verið endanlega ákveðin en hún verður annaðhvort í lok ágúst eða í október. Mun það skýrast síðar í sumar.
