Lögreglan á höfuðborgarsvæðinu greindi frá því í gær að til standi að taka skýrslur af um 35 manns vegna málsins og mun lögreglan á höfuðborgarsvæðinu veita liðsinni vegna þess.
Sjá einnig: Hvarf Jóns Þrastar Jónssonar:Írskir lögreglumenn munu taka skýrslur af 35 manns hérlendis
Irish Times fjallaði um þetta í gærkvöldi en í umfjöllun miðilsins kom fram að aðstandendur Jóns telji jafnvel að launmorðingi hafi myrt Jón en farið mannavillt. Hann hafi ætlað að ráða annan íslenskan karlmann af dögum sem var staddur á Írlandi á þessum tíma.
Í frétt Irish Times kemur fram að írska lögreglan telji að einstaklingar hér á landi búi yfir vitneskju um hvað gerðist en treysti sér ekki til að ræða það við íslensk lögregluyfirvöld. Vonast írska lögreglan til þess að þessir einstaklingar séu frekar til í að ræða við hana en þá íslensku.
Fulltrúar írsku og íslensku lögreglunnar hittust í höfuðstöðvum Europol í Haag í Hollandi fyrir skemmstu þar sem lagt var á ráðin um samstarf og fyrirkomulag rannsóknar. Á þeim fundi er írska lögreglan sögð hafa látið kollega sína á Íslandi fá lista yfir einstaklinga sem þeir vilja ræða við.
Jón Þröstur, fjögurra barna faðir, hvarf þann 9. febrúar 2019 eftir að hann sást yfirgefa Bonnington-hótelið í norðurhluta Dublin. Hann sást á öryggismyndavélum skammt frá hótelinu en síðan þá er ekkert vitað um ferðir hans.
