Flugstjóri vélar Air India-flugfélagsins sem brotlenti skömmu eftir flugtak frá borginni Ahmedabad í gærmorgun hét Sumeet Sabharwal og var sextugur að aldri.

Hann var með yfir 30 ára reynslu og hugðist setjast í helgan stein á næstu mánuðum. Ætlaði hann sér að verja meiri tíma með 82 ára föður sínum sem starfaði lengi innan flugbransans á Indlandi.

Sumeet hafði meðal annars það hlutverk að þjálfa og meta nýja flugmenn í venjubundnu farþegaflugi eftir að þeir hafa lokið þjálfun í flughermi. Aðeins vanir flugmenn með mikla reynslu og góða samskiptahæfni fá slíkt hlutverk.

Í frétt BBC kemur fram að Sumeet hafi haft yfir 8.200 flugtíma að baki sem gefur til kynna að hann hafi verið mjög reynslumikill.

„Hann var mjög hlédrægur og agaður. Við sáum hann oft koma og fara í einkennisbúningi en hann lét ekki mikið á sér bera,“ segir nágranni Sumeet í samtali við indverska fjölmiðla.

Aðstoðarflugmaður vélarinnar hét Clive Kundar og var hann með 1.100 flugtíma að baki og með réttindi til að fljúga Dreamliner-vélum Boeing.

Rannsókn á tildrögum slyssins stendur og er svarta kassans úr vélinni nú leitað. Vonast er til þess að hann geti varpað frekara ljósi á slysið.