Maður frá Flórída sem þóttist vera flugþjónn náði að svíkja út 120 flugferðir. Hann gæti hins vegar átt yfir höfði sér 30 ára fangelsisdóm.

Tímaritið People greinir frá þessu.

Umræddur maður heitir Tiron Alexander og er 35 ára gamall. Hann hefur verið sakfelldur af dómstól í Flórída fyrir að svíkja flugferðir út úr flugfélögum með því að þykjast vera flugþjónn sem og að fara í óleyfi inn á öryggissvæði flugvalla.

Eins og segir í ákæruskjali saksóknarans í héraðinu Suður Flórída komst Alexander um borð í vélar og þóttist vera flugþjónn á vegum annars flugfélags. En flugfélög veita hvort öðru þá þjónustu að ferja áhafnir á milli svo lengi sem starfsmennirnir tilgreina flugfélagið sem þeir vinna hjá, ráðningardag og starfsmannanúmer.

Á sex ára tímabili, árin 2018 til 2024, flaug Alexander 120 sinnum og laug til um atvinnu sína. Hann hafði tilgreint alls sjö flugfélög sem atvinnuveitanda og hafði skráð 30 mismunandi starfsmannanúmer.

Alexander var fundinn sekur fyrir viku síðan, þann 5. júní, og gæti átt allt að 20 ára fangelsisvist yfir höfði sér. Það er 20 ár fyrir fjársvik og 10 fyrir að fara inn á öryggissvæði í leyfisleysi. Refsing verður ákveðin þann 25. ágúst næstkomandi.