PCC hefur tilkynnt að rekstur kísilmálmverksmiðju (kísilvers) fyrirtækisins á Bakka á Húsavík verði stöðvaður um óákveðinn tíma og 80 starfsmönnum  sagt upp. Á Facebook-síðu fyrirtækisins segir að reksturinn verði stöðvaður tímabundið frá og með miðjum júlí næstkomandi og verði endurræstur þegar aðtæður á markaði batni.

Fjallað hefur verið um undanfarið að reksturinn hafi gengið illa. Í yfirlýsingu fyrirtækisins segir að erfiðar markaðsaðstæður og tollastríð eigi stærstan þátt í þessu.

Fyrirtækið segir erfitt að keppa við ódýran innfluttan kísilmálm frá Kína sem sé framleiddur með lakari sjálfbærni- og umhverfisstöðlum. Þetta hafi mikil áhrif á markaðsverð hér á landi. Afar mikilvægt sé að íslensk stjórnvöld hraði skoðun á markaðsaðstæðum sem fyrirtæki eins og PCC glími við í ljósi þessa innflutnings frá Kína. Fyrirtækið hafi kært innflutning á kísilmálmi á undirverði til fjármála- og efnahagsráðuneytisins. Einnig er minnt á að samtök framleiðenda kísilmálms í Evrópu hafi farið fram á verndartolla til að koma í veg fyrir að framleiðslan á þessum málmi sem sé afar mikilvæg leggist alfarið af í álfunni.

PCC segir að á meðan rekstrarstöðvun standi verði ráðist í ýmsar umbætur og reksturinn í heild endurskipulagður. Ætlunin sé að vera til reiðu til að hefja framleiðsluna aftur með skömmum fyrirvara um leið og aðstæður leyfi. Fyrirtækið sé staðráðið í að þróa verksmiðjuna áfram enda sé hún ein umhverfisvænsta kísilmálmverksmiðja heims.

PCC segir að lokum að 80 starfsmönnum verði sagt upp. Fyrirtækið harmar þau áhrif sem það mun hafa og ætlunin sé að halda áfram samtali við hagsmunaaðila til að finna lausn svo hægt sé að endurræsa verksmiðjuna þegar markaðsaðstæður leyfi.