Snarpur jarðskjálfti fannst vel á höfuðborgarsvæðinu rétt fyrir klukkan 23:00 í kvöld. Mbl.is greinir frá því að samkvæmt fyrstu tölum Veðurstofunnar var skjálftinn rétt um fjórir að stærð og var á sama stað og skjálfti fyrr í kvöld, á milli Trölladyngju og Kleifarvatns.
Fyrr í kvöld sendi Veðurstofa Íslands frá sér tilkynningu um skjálftahrinu austur af Trölladyngju, en þar höfðu nokkrir skjálftar mælst yfir 3 að stærð. Hrinan hófst um klukkan hálf sex og þegar tilkynning var send, 18:43, höfðu tæplega 50 skjálftar mælst. Meðaldýpi þeirra var um 4-6 kílómetrar. Stærsti skjálftinn, sem fannst vel í byggð, var samkvæmt fyrsta mati 3,6 að stærð.
Veðurstofan sagði að líklega væri um gikkskjálftavirkni að ræða, svipaða þeirri sem hefur verið við Reykjanestá og Eldey síðustu sólarhringa.
Veðurstofan tók samhliða fram að verulega hefði dregið úr skjálftavirkni á kvikuganginum og nánast engin virkni við Reykjanestá og Eldey síðustu 3 klukkustundirnar áður en tilkynningin var send.
Fréttin hefur verið uppfærð
