Verslunarstjóri Melabúðarinnar, Dýrleif Birna Sveinsdóttir, segir óskiljanlegt að ASÍ kjósi að hnýta í litla hverfisverslun eins og Melabúðina í tilkynningu sinni um verðlagseftirlit sambandsins sem forsvarsmenn verslunarinnar neituðu að taka þátt í. Þetta kemur fram í yfirlýsingu frá Dýrleifu sem senda var á fjölmiðla.

Tilefnið er fréttatilkynning frá ASÍ um verðlagseftirlit sambandsins þar sem tekið var sérstaklega fram að Melabúðin hafi hafnað þátttöku í eftirlitinu. Fréttin vakti nokkra athygli og benti fjölmiðlamaðurinn Egill Helgason meðal annars á að þessi tíðindi væru ekki til að auka hróður hinnar rómuðu verslunar.

Samanburður á verðum án annarra þátta gefi skakka mynd

Í yfirlýsingunni er bent á að Melabúðin sé sérverslun með sælkeravörur og hafi í gegnum tíðina ekki verið hluti af verðlagseftirliti ASÍ, „enda er rekstur einnar hverfisverslunar í vesturbæ Reykjavíkur allt annars eðlis en stórra verslanakeðja,“ segir í tilkynningu.

Melabúðin sérhæfi sig í fjölbreyttri matvöru, þar á meðal kjöti og fiski, sem unnin er á staðnum af fagfólki og eftir óskum viðskiptavina.

„Ferskleiki, gæði og persónuleg þjónusta eru í forgrunni og gera Melabúðina einstaka í íslensku verslunarumhverfi, sem samhliða býður upp á dagvörur sem spara fjölskyldum sporin í innkaupum fyrir heimilin.

Samanburður á verði án tillits til gæða, þjónustu og vöruvals dregur upp skakka mynd og tekur ekki tillit til sérstöðu sérverslana eins og Melabúðarinnar í samkeppni við stórar verslanakeðjur. Stórmarkaðir geta í krafti stærðar sinnar keypt vörur í miklu magni á lægra verði. Melabúðin keppir á hinn bóginn á grundvelli mikillar útsjónarsemi, miklum gæðum og persónulegrar þjónustu. Viðskiptavinir okkar kjósa að versla í sínu nærumhverfi og hefur búðin verið hluti af líflegri hverfismenningu, sem teygir anga sína jafnvel um allt höfuðborgarsvæðið,“ segir í yfirlýsingunni.

Þá bendir verslunarstjórinn á að starfsfólki ASÍ hafi aldrei verið vísað á dyr og um þetta fyrirkomulag hafi hingað til ríkt gagnkvæmur skilningur.

„Þessi háttur er þekktur í öðrum geirum atvinnulífsins, eins og fjölmiðlum, sem sumir kjósa að taka ekki þátt í samræmdum mælingum á notkun miðlanna þar sem stjórnendur þeirra telja mælingarnar gefa skakka mynd af markmiðum rekstrarins. Það er því óskiljanlegt að starfsfólk ASÍ kjósi á þessum tímapunkti að hnýta í litla hverfisverslun í Reykjavík, vega að hagsmunum starfsfólks og þjónustu við fjölskyldur í stað þess að beina spjótum sínum að þeim sem öllu ráða á dagvörumarkaði.“