Kona sem starfaði sem forstöðumaður umhverfis- og sorpmála hjá Akureyrarbæ er hætt störfum í kjölfar ásakana um að hún hafi áreitt undirmann sinn kynferðislega. Auk þess hafði borið á töluverðri gagnrýni eftir að sambýlismaður og barnsfaðir þessarar sömu konu var ráðinn sem ráðgjafi vegna sorptunnuskipta bæjarins.
Eins og DV greindi frá nýlega gætti töluverðrar óánægju með ráðninguna en samkvæmt ábendingum sem DV bárust var vafi talinn leika á að maðurinn væri hæfur til að annast þessa ráðgjöf en þó nokkurrar óánægju hefur gætt meðal bæjarbúa með sorptunnuskiptin sem hafa þótt ganga hægt. Farið var í skiptin vegna breytinga á lögum og aukinna krafna um sorpflokkun í kjölfar þeirra en þessar breytingar ættu flestir íbúar hér á landi að kannast við.
Guðríður Erla Friðriksdóttir sviðsstjóri Umhverfis- og mannvirkjasviðs Akureyrarbæjar var yfirmaður umræddrar konu en Guðríður tjáði DV að það hefði verið hún sjálf en ekki konan sem réð manninn til starfa. Guðríður viðurkenndi það í samtali við RÚV að eftir á að hyggja hefði átt að huga betur að tengslum konunnar og mannsins. Vildi Guðríður hins vegar meina að maðurinn hefði verið vel hæfur til að annast ráðgjöfina.
RÚV greindi síðan frá því fyrr í dag að konan væri nú hætt störfum í kjölfar ásakana um kynferðislega áreitni í garð undirmanns, á árshátíð bæjarins í október í fyrra, en hún hafði verið í leyfi í nokkurn tíma eftir að þær ásakanir komu fram. Samkvæmt heimildum RÚV höfðu fleiri einstaklingar sakað konuna um ósæmilega hegðun.
Guðríður sviðsstjóri sagðist ekki geta tjáð sig við RÚV um málefni konunnar.
Uppfært: RÚV fullyrti upphaflega að forstöðumanninum hefði verið sagt upp störfum en hefur nú uppfært fréttina eftir athugasemdir frá lögmanni konunnar. Nú segir RÚV að konan sé hætt störfum en tekur ekki fram hvernig starfslokin komu til. Frétt DV hefur verið uppfærð til samræmis.
