Maðurinn sem lést í vinnuslysi í Vík í Mýrdal föstudaginn 28. febrúar hét Pálmi Kristjánsson.
Pálmi var 41 árs, fæddur 1983, búsettur í Vík og lætur hann eftir sig sambýliskonu og tvö ung börn.
Söfnunarreikningur hefur verið stofnaður fyrir Elinu sambýliskonu Pálma. Í færslu sem margir deila á samfélagsmiðlum segir:
„Kæru Mýrdælingar, ættingjar og vinir. Okkar ástkæri Pálmi féll frá langt fyrir aldur fram í hörmulegu slysi. Eftir stendur sambýliskona hans hún Elina í mjög erfiðum aðstæðum. Því höfum við stofnað söfnunarreikning fyrir hana til að létta undir með henni í framtíðinni.
Margt smátt gerir eitt stórt. Stöndum með henni á þessum erfiðu tímum. Deilið að vild.“
Kennitala: 260586-4679
Reikningur: 0370-22-105092
Tilkynning barst um slysið klukkan 13:45 og voru viðbragðsaðilar og lögregla skjótir á vettvang. Endurlífgunartilraunir voru reyndar á vettvangi en báru ekki árangur.
„Það er þó ekkert saknæmt sem hefur átt sér stað þarna eða einhver glæfraskapur. Þetta er fyrst og fremst alveg hörmulegt slys,“ segir Garðar Már Garðarson, aðalvarðstjóri hjá lögreglunni á Suðurlandi, í samtali við Vísi. Segir hann að rannsókn standi enn yfir, henni miði vel og lögregla telji sig vita hvað gerst hafi.
