Í ágúst 2023 var breski hjúkrunarfræðingurinn Lucy Letby sakfelld fyrir morð á sjö ungabörnum og tilraun til að myrða sjö aðra hvítvoðunga á Chester-spítala í samnefndri enskri borg. Málið gegn Letby vakti heimsathygli en hún var dæmd í lífstíðarfangelsi fyrir hina hryllilegu glæpi sína. Átti hún að hafa sprautað lofti inn í blóðrás nýburanna sem hafi orðið þeim að aldurtila.

En þegar rykið fór að falla til jarðar fór að bera á efasemdum um niðurstöðu dómstólsins. Nú hefur teymi fjórtán sérfræðinga lokið rannsókn sinni á málinu og niðurstöðurnar voru kynntar á blaðamannafundi í London í morgun. Hópurinn komst að þeirri niðurstöðu að ekkert benti til þess að Letby hefði gert sek um að hafa myrt börnin og að andlát þeirra mætti rekja til vanrækslu og lélegrar ummönnunnar á spítalanum. Daily Mail greinir frá.

Dr. Shoo Lee, sem sestur er í helgan stein en er afar virtur á sviði nýburalækninga, fór fyrir nefndinni. „Dauði eða skaði sem þessir nýburar urðu fyrir var í öllum tilvikum af náttúrulegum orsökum eða vegna vanrækslu,“ sagði Lee á blaðamannafundinum. „Í stuttu máli, dömur mínar og herrar, þá fundum við enga morðingja,“ bætti Lee ennfremur við.

Lee og skýrsluhöfundar fóru síðan yfir dauðsfall hvers ungabarns fyrir sig og útskýrðu hvað hefði að öllum líkindum valdið andláti þeirra.

Sjá einnig: Lucy var dæmd fyrir að hafa myrt sjö kornabörn

Lee er höfundur vísindagreinar frá árinu 1989 sem fjallar um skaðann sem loft getur valdið komist það í æðar ungabarna. Ákæruvaldið í máli Letby vísaði ítrekað í vísindagreinina í réttarhöldunum og átti greininn þátt í sakfellingu Letby. Lee segir hins vegar að saksóknarar hafi misskilið niðurstöðu vísindagreinarinnar og ekki sé neitt að finna í henni sem bendi til sektar hjúkrunarfræðingsins.

Ein helsta ástæða þess að Letby var tengd við málið til að byrja með var sú að hún átti að hafa verið á vakt þegar allir hvítvoðungarnir önduðust eða sýndu merki um að eitthvað væri að. Í byrjun vikunnar var hins vegar greint frá því að ný gögn bentu til þess að það væri ekki rétt, Letby hefði ekki verið á vakt í að minnsta kosti þriðjuni tilvikanna.

Skýrsla Lee og hinna sérfræðinganna verður eitt helsta sönnunargagn lögfræðinga Letby en ráðgert er að nefnd muni taka fyrir mál hennar á næstunni og meta hvort að það verði endurupptekið eins og hávær krafa er um.