Lögreglunni á Norðurlandi eystra barst á fimmtudag, 23. janúar, tilkynning um að hundur hafi ráðist á konu sem var á gangi á Wilhelmínugötu, til móts við Jóninnuhaga á Akureyri. Málið er nú rannsakað.
Þetta kemur fram í tilkynningu lögreglunnar á Norðurlandi eystra.
„Eftir árásina var konan flutt á Sjúkrahúsið á Akureyri til aðhlynningar en hún var slösuð eftir árásina,“ segir í tilkynningunni.
Málið eru nkomið til rannsóknardeildar. Matvælastofnun (MAST) og Akureyrarbæ hefur verið tilkynnt um málið, en það eru stofnanirnar sem fara með málefni dýra.
„Upplýsingar eru um að mögulega hafi vitni verið að árásinni. Viðkomandi eru beðin um að gefa sig fram við lögreglu eða hafa samband í síma 444-2800 á opnunartíma,“ segir í tilkynningunni.
