Flugvél flugfélagsins Uzbekistan Airways þurfti að gera neyðarlendingu í Keflavík í dag. Kona fæddi barn um borð í vélinni.

Vélin var á leiðinni frá Tashkent, höfuðborg Úsbekistan, til New York í Bandaríkjunum þegar að kona fór í fæðingu. Um er að ræða rúmlega 13 klukkustunda langt flug.

Vegna þess var farið í neyðarlendingu á næsta flugvelli, sem reyndist vera í Keflavík. En konan fæddi barnið í vélinni og merkilegt nokk þá voru bæði kvensjúkdómalæknir og skurðlæknir um borð sem hjálpuðu henni við það. Eftir lendingu var farið með móðurina og barnið á sjúkrahús. Vélin hélt áleiðis til New York eftir hádegi í dag.

„Ótrúlegur atburður átti sér stað um borð í flugi HY101, frá Tashkent til New York, degi eftir 33 ára afmæli flugfélagsins. Kona fór af stað í fæðingu og fæddi dreng. Áhöfnin ákvað að gera neyðarlendingu á flugvellinum í Keflavík,“ segir í tilkynningu flugfélagsins.