Móðir sex ára drengs í Mosfellsbæ segist nánast hafa orðið orðlaus yfir góðverki fjögurra unglinga sem komu syni hennar til bjargar er hann villtist á ferðum sínum og stóð í reiðileysi fyrir utan KFC við Háholt, þegar unglingana, sem eru í kringum 14 ára aldur bar að.
Litli drengurinn hafði tekið strætisvagn til að sækja bróður sinn en vissi ekki hvernig hann ætti að taka strætisvagninn til baka. Hann var símalaus og fann ekki bróður sinn og vissi ekki hvernig hann átti að komast heim. Móðir hans, Monika Ewa Orlowska, greinir frá málinu í íbúahópi á Facebook:
„Mig langaði að hrósa fjórum unglings strákum (og foreldrum þeirra) sem sýndu í dag mikinn þroska, ábyrgð og náungakærleik.
6 ára gamli sonur minn skilaði sér ekki heim eftir frístund í dag. Ég var við það að hafa samband við aðra foreldra barna í bekknum þegar ég fékk skyndilega símtal.
Einn þessara drengja hringdi til að láta mig vita að sonur minn væri einn á vappi við götu hjá KFC og þeir buðust til að bíða með honum inni þar til ég kæmi að sækja hann.
Forsagan er sú að honum datt í hug að taka strætó að sækja bróður sinn, sem var þá löngu kominn heim af æfingu. Gaurinn var símalaus, fann hvergi bróður sinn og ekki alveg viss um hvernig hann ætti að taka strætó heim.“
Monika segist nánast hafa orðið orðlaus yfir framgöngu unglinganna sem sáu til þess að drengurinn gat hringt í hana. Þeir hafi áttað sig á því að ekki var allt í lagi hjá syni hennar á meðan margir fullorðnir hafi gengið framhjá honum og ekki skeytt um hann:
„Ég var eiginlega orðlaus þegar ég sótti hann, ekki bara yfir þessu uppátæki hans heldur aðallega yfir þessu góðverki. Margir fullorðnir gengu framhjá án þess að veita honum gaum en þessir fjórir drengir, sem voru sennilega ekki eldri en 14 ára, sáu son minn einan í óvenjulegum aðstæðum, nálguðt hann og brugðust hárrétt við. Þeir ræddu það sín á milli hvort þeir ættu ekki að hringja í lögregluna en gátu hringt í mig þar sem sonur minn man nr. mitt.
Bravó strákar fyrir að vera flottir og bravó foreldrar fyrir gott uppeldi!
Þvílíkar fyrirmyndir“
